15 Oct 2015

Setlhopha sa dikhamphani tse di itsegeng ka leina la World Group of Companies se abetse sekolo se sebotlana sa Letsholathebe dibolo tsa kgwele ya dinao le tsa bolotloa e le tsela nngwe ya go rotloetsa metshameko mo baneng ba sa le babotlana. 

Go ya ka mogolwane wa Interprop, Rre Thari Nkwe, Batswana bangwe ba akaretsa motabogi, Rre Nijel Amos, a itshetsa ka metshameko. A re ka jalo go botlhokwa gore metshameko e engwe nokeng ka ditsela tsotlhe. 

Rre Nkwe le dikhamphani tsa gagwe ba abetse sekolo seo dibolo di le lesome le bone mme e bile ba itlamile go abela dikolo tsotlhe tse dibotlana mo kgaolong ya bokone botlhaba. 

Rre Nkwe o tlhalositse fa e se bana botlhe ba ba leng ditlhaloganyo di bogale, a tlatsa ka gore bangwe ba kgona metshameko ka jalo ba tshwanetse go ojwa ba sale metsi gore ba tle ba kgone go inwa moro fela jaaka Rre Amos. 

O tsweletse ka gore metshameko fela jaaka dithutego tse dingwe, e botlhokwa mme e bile e tshwanetse go tsewa tsia, bana ba rotloediwe ka ditsela tsotlhe a akaretsa dithuso di tshwana tsone tsa go ba abela dibolo. 

A re ba tla leka fa ba kgonang teng go thusa puso go ema nokeng metshameko mo lefatsheng le. Rre Nkwe o tladitse ka gore ga se ba bokone botlhaba fela ba tla akolang dithuso tseo, mme ba tla tsamaya lefatshe ka bophara ba abela dikolo tsotlhe tse dipotlana dibolo. 

E rile a tswa la gagwe, Mme Ludo Machinya go tswa kwa lephateng la banana, metshameko le ngwao o tlhalositse fa metshameko e le konokono mo itsholelong ya Botswana. 

A re Batswana ba tshwanetse go tsaya metshameko ka tlhwaafalo ka e ka tlisa pharologanyo mo matshelong a bone, a tlatsa ka gore bangwe ba e dirisa go itshetsa ga mmogo le gone go tlhokomela ba malwapa a bone. 

O ne a leboga seabe sa World Group of Companies, ka ba thusa go tlhabolola metshameko mo Botswana. Mogokgo wa sekolo se sebotlana sa Letsholathebe, Mme Binkie Majoko o ne a tletse ka monyenyo go bo dikeledi tsa bone di phimotswe. Go ya ka Mme Majoko, dibolo tseo di tla thusa le mo mantlwaneng a borutelo segolo jang mo dithutong di tshwana tsa Creative and Performing Arts (CAPA) e seng kwa mabaleng fela. 

A re dithuto tseo di ruta ka mefuta ya metshameko ka jalo bana ba tla supegediwa ba bo ba tlhalosediwa ka botlalo, ba bone le ka matlho gore fa gotwe dibolo go a bo go buiwa ka eng le ka fa di tshamekiwang ka teng ka go farologana ga tsone. A re bontsi jwa bana ba a bo ba le mo lefifing ka ba bala fela mo dibukeng, ba bona le ditshwantsho fela ka jalo ba tla nna le lesedinyana la se go a bong go buiwa ka sone. 

A re dibolo tseo di tla thusa gape go ntsha bana bodutu ga mmogo le gone go ba kgapha mo mebileng. 

O tladitse ka gore bana ba tla kgona le gone go anywa botsipa jo bo tseneletseng ka metshameko le ka fa e tshamekiwang ka teng. 

A re le ntswa sekolo sa gagwe se ne se dira bontle mo dikgaisanong tse dingwe tsa metshameko ntle le dikgwetlho di tshwana tsa tlhaelo ya didirisiwa jaaka tsone dibolo, jaanong o dumela fa ba tla gaisa le go feta. 

Mme Majoko a re ba ntse ba sa kgone go ikatisa fa go tsena nako ya metshameko mme ka jalo o solofela fa ikatiso e tla nna e e mashetla. A re o eletsa go bona folaga ya lefatshe le e le kwa mankalankaleng fa go tla mo go tsa metshameko.

Modulasetilo wa komiti ya batsadi le barutabana , Rre Joseph Pelaelo o rotloeditse a bo a kopa bana le barutabana ba sekolo seo go dirisa dibolo tseo ka kelelelo, ba di tlhokomele e bile ba di dirise jaaka ba laetswe go nale go kgabisa ka tsone. Bokhutlo