11 Oct 2015

Mopalamenete wa Lobatse, Rre Sadique  Kebonang, o rotloeditse setshaba go nna le mowa wa tshwaragano a re seo se ka thusa go aga setshaba se se itekanetseng e bile se melediwa mathe ke ditshaba tsa mafatshe a mangwe.

Rre Kebonang o buile jalo bosheng a  amogela  molelo  wa kgolagano kwa Lobatse, morago ga letsatsi go tswa kwa gaMalete a tlhalosa fa molelo o  wa kgolagano e le sekano sa go ipelela tsotlhe tse leaftshe la Botswana le di kgonneng morago ga go tsaya puso mo go Mmamosadinyana.

Ka jalo o ne a gwetlha setshaba go bopagana gore go rene kagiso le thokgamo go tila madubedube a dikgoberogo tse di ka bakwang ke dipharologano tsa sepolotiki tse a tlhalosang fa di ka phutlhamisa maiteko a go isa lefatshe kwa pele.

Fa a leboga, mothusa mmatoropo wa Lobatse, Rre Francis Mokwena o ne a leboga baeteledipele botlhe ba toropo eo le setshaba ka kakaretso   go sa ipona tsapa,   go tsaya karolo mo tirong e e hapegileng eo.

Rre Mokwena o boletse gore toropo ya Lobatse e lesego ka gore e amogetse lebone le la kgolagano le santse lele lesha , a tlatsa ka gore le tlaa tlogela  tsotlhe tse dintle le thokgamo  e e tlaa fitlhelwang ke bana le dikokomane mo isagong.

 Mokwaledi wa khansele ya toropo ya  Lobatse Mme Boikhutso Matenge o supile fa letsatsi le  le faphegile ka gore molelo o tlaa tlogela lesedi mo toropong jalo lesedi le le phatsime go ya go ileng, le tswerwe e le la botshelo  mme go ntse  go gopolwa Modimo. Bokhutlo