14 Sep 2015

Kgosi Tlhabologo Boima wa Mmadikola a re dikgang tsa go thubega ga malwapa di ile magoletsa. Kgosi Boima o buile jalo mo potsolotsong bosheng. A re go lebega fa boleng jwa nyalo bo tsweletse ka go wela tlase mme se se bakwa ke banyalani ba ba sa tlotleng malwapa a bone.

A re go tlhoka morero ga banyalani go na le seabe mo go thubeng malwapa.

“Rre o kgona go tsaya dilwana mo lwapeng a di rekisa mosadi a sa itse mme e re fa a botsa a bo a mo keteka.”

A re o lemogile gore batsadi ga ba fe bana ba bone molao o o lolameng wa lenyalo. A re bogologolo banyalani ba ne ba tlhalosediwa fa nyalo e se ‘mme mphe bogobe,’ ka jalo go batla batho ba ititeile sehuba gape ba ikemiseditse go emela dikgwetlho tsotlhe go fitlhelela ba kgaoganngwa ke leso.

A re kgokgontsho ya bomme le bana e golela pele mo go felelang go baka gore bomme ba tlogele malwapa. Kgosi Boima o gateletse fa tsosoloso ya serodumo sa nyalo le go fokotsa dipalo tsa tlhalo di ka kgonagala fa banyalani ba ka fetola boitshwaro le go sala morago ngwao ya Setswana. Ends