08 Sep 2015

Bakgatla- ba- ga- Mmanaana ba sa tswa go tshwara moletlo wa dikgafela bosheng kwa kgotleng kgolo ya Moshupa.

Moletlo o, o o neng o tshologetswe ke batho ka go farologana, dikgosi, matona a puso, Bakgatla go tswa Disaneng kwa Afrika Borwa ga mmogo le ba bangwe go tswa kwa Lesotho, o simolotse ka go goroga ga bojalwa go tswa mo makgotlaneng ka go farologana.

E rile a bula moletlo oo semmuso, sebui  segolo sa letsatsi Rre Meshack Tshekedi go tswa kwa Botswana Investment and Trade Centre,  a akgolela Ba-ga-Mmanaana go bo ba tsweletse ka go tshegetsa ngwao ka go dira moletlo oo.

A re go dira jalo ke sesupo sa gore morafe o gatetse pele ka go ikgakologelwa le go tlotla ngwao e bile a re ke go supa gore ba dirisana sentle le kgosi ya bone. O tlhalositse gore boikarabelo jwa bone ke go tsamaya ba rotloetsa Batswana go ikgakologelwa ba tsosolosa ngwao. 

A ba a leboga Kgosi Oscar Mosielele go bo a rotloetsa morafe wa gagwe go dira moletlo oo, a solofetsa fa ba tlaa tswelela ba ba ema nokeng.

Rre Tshekedi o ne a ntsha cheke ya P10 000 a e neela Kgosi Mosielele go ba rotloetsa mo maitekong a bone.A re o tlhaloganya gore ga se tiro e e motlhofo. Kgosi  Mosielele ene o ne a tlhalosa fa moletlo oo wa dikgafela o direlwa go lebogela temo e e fetileng le go baakanyetsa e e tlang.

A re ba na le ditso le Bahurutshe boo Manyana. 

A re o tlaa bitsa morafe  wa gagwe  go  ipelela ditso  tsa Bahurutshe  gaufi le legaga la ga Mma Sechele. A re Bahurutshe ba innile le seabe se segolo mo ntweng ya Dimawe e e neng e thulantse basweu le merafe ya Batswana. A re legaga leo le na le ditso tse di nonofileng ka le ile la fitlha bahumagadi ba bararo ka nako ya ntwa. 

O ne gape a lebogela madi ao, a re a a ba kgothatsa, a ba a leboga baeng ba ba sa iponang tsapa go tla go ba thela malepe.

E re ka moletlo wa Dikgafela o ikaegile ka temo segolo jang ya komelelo, Rre John Stegling go tswa kwa Lephateng la Tepo Loapi o tlhalositse fa pula mo kgaolong ya Borwa e le boutsana go simolola ka ngwaga wa 1992. A re phetogo ya loapi e ama mongwe le mongwe ka jalo a ba kopa go fetola ka fa ba lemang ka teng gore ba kgone go dira dipoelo.

Mookamela ditirelo tsa lephata la temo-thuo mo kgaolong ya Borwa Rre Gwilizani Maposa ene o rotloeditse batsena- moletlo go dirisa dipeo tse di bogadi bo gaufi le go dira temo ya tshomarelo. Gape o ba rotloeditse gore ba seka ba ipona tsapa go lema ka paka ya  mariga. 

A re e bile fa ba lemile mo pakeng ya mariga ba ka bona dikatso tsa selekanyo sa  P500  tema nngwe le nngwe. Moletlo o, o ne wa natefisiwa ka mmino wa dikhwaere, mmino wa setso ga mmogo le poko ka go farologana  go jewa dijo tsa setso jaaka kabu, dithotse le tse dingwe go supa ngwao. Bokhutlo