02 Sep 2015

Mogwebi wa marekisetso a dilwana tsa kago a Maxi Save mo Serowe, Rre Mahbud Alan o abetse ba-na-le bogole dijo e le go tsweledisa maitlamo a gagwe a go thusa ba ba dikobo dikhutshwane.

Rre Alan a re o tswa kgakala a dira tiro e ya bopelotlhomogi mme a lomaganngwa le ba ba tlhokang dithuso ke mogokaganyi wa mokgatlho wa ba-na-le bogole wa Serowe Disabled Association e bile e le mokhanselara wa pele yo o itlhophetsweng wa kgaolo ya Serowe Bokone Mme Punie Koloi.

A re ka ngwaga wa 2012 o ne  a kopana le Mme Koloi, yo le ene e leng mo-na-le-bogole,  mme a mo kopa go mo thusa go mo batlela ba ba tlhokang mme ene a itlama go ba thusa  ka dijo kgwedi le kgwedi.

A tswelela a re maiteko a bone a ne a atlega ka jaana bangwe ba a ba thusang e bile ba akola dithuso tsa gagwe e leng Boitshwarelo Mmopa le Boineelo Tsalayabotshelo, botlhe e le banni ba Paje e bile e le ba-na-le-bogole.

 “Ke dira se go tswa mo pelong ya me ka gore ka tumelo ya me re dumela fa bopelontle le boammaaruri bo tsala bopelotlhomogi mme ke ka moo ke itlamileng go thusa ba ba sa kgoneng”.

A re maikaelelo magolo mo go abeleng ba ba sa kgoneng ke go tsisa ditshegofatso le tsholofelo mo go ba ba sa kgoneng. Fa a rola mpho eo mo boemong ja ga Rre Alan, Mme Punie Koloi o ne a tlhalosa fa a tswa kgakala a thusa Rre Alan go batla ba ba tlhokang.

A re tiro ya gagwe ke go buelela ba-na-le bogole le go ba batlela dithuso fa ba sa kgoneng teng ke ka moo a tshwaraganetseng tiro e le ba Maxi Save. O tsweletse a tlhalosa gore bone mo mokgatlhong wa bone kwa Serowe Disabled Association ba itebagantse le go thusa ba-na-le bogole le go nna lentswe la bone.

A re mokgatlho wa bone o tlhomilwe ka ngwaga wa 1996 mme o kwadisitswe ke ba Registration of Societies.  A re ba setse ba kgonne go fa bangwe ba ba ba batlelang dithuso lefelo fa ba ka direlang teng go tsweledisa dikgwebo tse ba itshetsang ka tsone.

O tsweletse a tlhalosa fa a sa thuse banni ba Serowe fela mme le ba dikgaolo tse di mabapi le bone ba thusiwa. Fa a amogela mpho eo mme Rapelang Mmopa o ne a tlhalosa fa a itumelela se bo Rre Alan le bo mme Koloi ba se dirang.

A re go tswa ka ngwaga wa 2012 go fitlhela gompieno ngwana wa gagwe o ntse a akola dithuso tse, ka e bile go sena epe gape thuso e a e bonang. “Modimo a okeletse Rre yo fela thata, se a se re direlang se se golo thata “ ga tshwaela Mme Mmopa ka boitumelo. BOKHUTLO