27 Aug 2015

Dikolo tsa bananyana di botlhokwa ka di thusa bana go ithuta ba sena kgatelelo fa ba setse ba dira lekwalo la ntlha kwa dikoleng tse di potlana.

Fa a bua mo potsolosong ka Mosupologo, Mme Winnie Selema yo e leng morutabana kwa sekolong sa bananyana sa King Zone Day Care Centre mo Bobonong o tlhalositse fa go isa bana kwa dikoleng tsa bananyana go le botlhokwa ka di ruta bana go itlhokomela gammogo le go ithuta sentle fa ba simolola lekwalo la ntlha. O tlhalositse fa bana ba ba tseneng dikole tsa bananyana ba dira sentle mo dithutong kwa dikoleng tsa di botlana go na le ba ba iseng ba di tsene.

Mme Selema a re ba ruta dithuto di tshwana dipalo,maranyane gammogo le go ba ruta ka mefuta ya diphologolo.

O tlhalositse gape fa ba ruta bana go bua sejatlhapi (English) ka sejatlhapi se utlwa ke mongwe le mongwe a tlatsa ka gore seo se neela bana tshono ya go ka tsalana le bangwe ka bone. Fa a latlhela la gagwe mongwe wa barutabana kwa sekoleng seo, Mme Gaone Mooketsi o tlhalositse fa sekole sa bone se tsaya bana ba ba dingwaga tse pedi go ya go tse tlhano.

A re fa ngwana a le dingwaga tse pedi kana tse tlhano o a bo a setse a tlhalefile go na le yo o dingwaga tse di kwa tlase.

Mme Mooketsi o tlhalositse fa go isa bana kwa dikoleng tsa bananyana go le botlhokwa ka go neela ngwana mowa wa botsalano. O rotoeditse batsadi go isa bana kwa dikoleng tsa bananyana ka gore go dira jalo go tlhofofaletsa bana go ithuta sentle ba sena kgatelelo. Ends