19 Aug 2015

Mokhanselara wa metse ya Omaweneno, Maralaleng le Kisa mo kgaolong ya botlhophi ya Kgalagadi Borwa Rre Ronald Baitsiwe o kgadile a sa kgwe mathe ditiro tsa borukutlhi tse banni bangwe ba Kisa ba inaakantseng le tsone di akaretsa bogodu jwa leruo gareng ga tse dingwe.

Mokhanselara Baitsiwe o supile seo fa a ne a le mo leetong la go lekola banni, a re borukutlhi ga bo na maduo ape a a molemo ka bo busetsa kwa morago mo go tsa ditlhabololo, kagisano le sone seriti sa motse se wela mo
seretseng.

Rre Baitsiwe a re morafe o eme ka dinao go lwantsha borukutlhi, ba bope ditlhopha tsa twantsho borukutlhi, ntebela ke go ke go lebele le gone go loma mapodise tsebe ka ditiro dipe hela tse di sa jeseng diwelng mo motseng.

O tsweletse ka go kgala mokgwa wa go mpampetsa, a re go sireletsa borukutlhi go bolaya maiteko a go aga tshaba e e sireletsegileng

Mokhanselara a re fa e sale ngwaga wa 2015 o simologa, go gatisitswe dikgang tse thataro tsa go robala le bana ba ba kwa tlase ga dingwaga tse di lesome le borataro, tse tlhano tsa petelelo, le tse nne tsa go thubiwa ga matlo

Dikgang tsa bogodu jwa leruo ka ngwaga wa 2013 go ne ga gatisiwa 149, ka 2014 ga gatisiwa 44 mme 2015 go setse go gatisitswe 38.

Go thubiwa ga marekisetso ka ngwaga wa 2013 go ne ga gatisiwa dikgang tse 64, ka 2014 ga gatisiwa 45, mme ngwaga wa 2015 go setse go gatisitswe 16.

O solofeditse fa ba tlaa nna tsebe ntlha go utlwa dilelo le gone go emela morafe go ba thusa go isa ditlamelo kwa go bone ka dinako tsotlhe.

Mokhanselara o buile seo fa a araba dipotso le dikakgelo ka morafe tse di neng di ama dikgang tsa ditlamaelo le dithuso tsa bongaka, dithuso tsa bommaboipelego, mananeo a Ipelegeng le nyeletso lehuma, thuto ga-e golelwe, tsa temo le tsa bokenti.

Dikgang tsa tiego ya go isa ditlamelo ka nako, mokhanselara o supile fa dikgwetlho tseo bontsi jwa nako di bakwa ke letlhoko la madi le boitseanape kana bodiredi ka ebile badiri bangwe ba sa batle go berekela kwa dikgaolong tse di kgakala le ditlamelo.

Fa a tswa la gagwe mokhanselara Simane yo o itlhophetsweng ke tona o ne a tshwaela ka gore morafe o tlhaloganye seemo sa gore ditlamelo dingwe di tsibogelwa ka bonako go lebilwe seemo sa baikopedi mme go sa reye gore ba bangwe ba lebetswe kana ba tsewa ka letsogo la molema.

O tsweletse ka go gwetlha morafe bogolo jang banana go inaakanya le mananeo a puso go tlhabolola matshelo a bone.

Rre Simane a re go ikaega ka puso e le nosi ga go busetse mme a rotloetsa mowa wa go ipelega, go dirisa ditalente go itshetsa le gone go itlwaetsa go botsa le go kopa dithuso, ditshwanelo le sepe fela se se itebagantseng le go tlhabolola matshelo a batho le gone go isa Botswana ko pele mo ditlhabololong.

O ne a tlatsa ka go supa fa bojalwa le ditagi e le mmaba, ka gape e le tsone tse di bakang masula otlhe mme a kopa banana go ipatlisisa, le go ikgapha mo go tseo mme ba Kgosi Matshidiso Babeile wa Kisa o supile boitumelo go bo morafe o tsibogetse go botsa le gone go akgela mo go tse di amang matshelo a bone.

O rotloeditse morafe go tswelela ba ikemela le gone go ipelega ka dinako tsotlhe ba sa bee mokgwele otlhe mo pusong jaaka  Setswana se re E a re go tlogelwa tsatsing se ikise moriting. Bokhutlo