17 Aug 2015

E
re ntswa dipula tsa ngwaga tlola di ne di le boutsana, ebile balemi ka bontsi
ba dule kwa masimong ba iphotlhere, fela, se ga e a tshwanela go nna lebaka la
go tlhoka go emela temo ka dinao monongwaga.

Mafoko a a builwe ke molemisi
wa Hatsalatladi mo kgaolong ya Kweneng Rre Joshua Pagiwa  kwa 
Hatsalatladi fa a ne a buisa phuthego ya balemi.

Rre Pagiwa a re lenaneo la go
lemela balemi la ISPAAD le santse le le teng e le maitlamo a puso go ba thusa.
 A re dipeo, melemo e e bolayang diji le menontshane di tlaa bo di neelwa balemi
ba sa lopiwe sepe.

O boletse fa puso e itlamile
gape ka go thusa balemi ka terata e ba ka teratelelang masimo ka yone mme ba
ntshe sephatlo sa madi a a tlaa lopiwang ke morekisi mme puso e ntshe sephatlo
se sengwe.

A re go teratelela masimo go siame thata ka go hema kgwetlho ya go
senyediwa ke leruo le tshwana le dikgomo, dihutshane ga mmogo le tsone
diphologolo tsa naga tota.

Le fa go ntse jalo, Rre
Pagiwa o kgadile a menne phatla balemi ba a reng ga ba dirise mananeo a ka
botlalo. A re go na le balemi ba ba tsayang dipeo tse ga mmogo le menontshane
mme ba bape le tsone kwa masimo ba sa di dirise a tlatsa ka gore terata yone
bangwe ba balemi ba e beile fela kwa malwapeng ka fa morago ga matlo.

A re balemi bangwe fa ba sena
go lema ba tlogela masimo mme bo lobeto ba tshwana le mohero, dikgaka le masogo
ba sale ba ipha naga. O sedimositse fa go dira jaana e le tshenyetso setshaba
ka gore dipeo tseo le menontshane ya teng di ka bo di filwe molemi mongwe yo o
kabong a tlhokometse temo.

Molemisi Rre Pagiwa o
rurifaleditse balemi gore jaaka molemisi, puso e mo file dithata tsa gore a
seka a fa balemi ba ba sa tseeng temo tsia ka mokgwa o dipeo a bo a kopa balemi
go nna le tirisanyo e e lolameng le beng ba diterekere.

O gakolotse balemi gore mo
seemong sa ba sa kgona go dirisa dipeo kana sepe fela se ba neng ba se filwe,
ba mo itsise gore a bone gore o ka babalela dilo tseo jang.

E rile a itebaganya le
banana, Rre Pagiwa a ba kgothaletsa go tsena mo temong ka dipalo tse di kwa
godimo a tlatsa ka gore temo ga se selo sa bagolo fela.

A re mo pakeng e e
fetileng ya temo go ne go na le banana ba ba neng ba inaakantse le temo le fa dipula
tse di boutsana e ile ya nna sekgoreletsi, a tlhalosa fa monana mongwe mo go
bone a ne a roba dikgetsi tse di masome mararo le metso e le supa.

Molemisi Pagiwa o ne a wetsa
puo ya gagwe ka go kgothaletsa balemi go tsenelela ditshupo a supa fa go le botlhokwa
thata go nna le sebaka sa go amogana maele le balemi ba bangwe ba ba seng mo
kgaolong ya bone.

O kopile balemi gore ba seka ba rekisa masimo a bone ka
lefatshe le le botlhokwa fela thata. E rile fa ba mo kgwa kgaba,
balemi ba motse wa Hatsalatladi ba supa fa ba lebogela mananeo a puso e ba a
beileng pele mme ba kaya fa go sena tirisanyo mmogo e e tletseng fa gare ga
bone le beng bangwe ba diterekere.

Mongwe wa balemi ba e bong Rre Mmolotsi Montshwari o
rotloeditse balemi go tlhokomela diterata tsa masimo a bone. A re balemi bangwe
ba sale ba tsentse terata dingwaga tse dintsi tse di fetileng mme ga ba e
tlhabolole ka go e baakanya fa e sa itekanelang teng.

Rre Montshwari a re
terata ke selo se se tshwanetseng go sekasekiwa ngwaga le ngwaga fa molemi a
ipaakanyetsa go lema. BOKHUTLO