16 Aug 2015

Go godisetsa ngwana mo poifong Modimo go kailwe fa go le botlhokwa ka
go na le seabe se se tona mo boitsholong jwa gagwe. Se se builwe ke Moruti
 Mothusi Motlhanka wa kereke ya Assemblies of God kwa Bobonong mo potsolotsong bosheng.

Rre Motlhanka a re ngwana yo
o golelang mo kerekeng o rutiwa botlhokwa jwa poifo Modimo ga mmogo le go
tlotla ba ba tshelang le ene, mme se se dire gore a nne le botshelo jo bo eletsegang
mo setshabeng.

O ne a tlhalosa fa go godisa
ngwana mo nakong ya gompieno go farologane thata le mo nakong e e fetileng ka
batsadi ba faraferwe ke mabaka a mmereko le ditiro tsa selegae.

A re se se baka gore batsadi
ba seka ba nna le nako e ntsi ya go ka ithuta bana ba bone le go aga maitsholo
a bone. Rre Motlhanka o kaile fa go
inaakanya le dikereke go thusa gore bana ba kgone go bona bogakolodi jo bo
botoka ka go sa ba neele sebaka sa go tsaya boitsholo jo bo sokameng go tswa mo
ditsaleng.

O ne a lebogela sebaka se ba
se fiwang e le baruti ke bogogi jwa dikole tsa Bobonong go rutuntsha bana ka
lefoko la Modimo. A re se se ba fa tsholofelo ya gore ba tlaa kgona go
diragatsa seabe sa bone e le dikereke sa go diragatsa tebelopele ya Botswana go
nna setshaba se se siameng e bile se na le botho.

Fa a tlatsa mafoko a, moruti
Tebogelo Taolo, wa kereke ya United Congregational Church of Southern Africa
(UCCSA) mo Bobonong, o ne a supa fa go le botlhokwa gore kgodiso ya ngwana e nne
maikarabelo a mongwe le mongwe mo setshabeng.

O tlhalositse fa bogologolo
kgodiso ya ngwana e ne e le motlhofo ka boikarabelo jwa ngwana bo ne bo le mo
maruding a mo-na-le-seabe mongwe le mongwe. A re go boela mokgwa o, go ka
tokafatsa thata boitshwaro jwa bana ka keletso e le gore ngwana a gole e le
motho yo o maikarabelo e bile a le botho.BOKHUTLO