15 Aug 2015

Mapodisi a Letlhakane a tlhotlhomisa tiragalo e mo go yone monna wa dingwaga tse di masome mabedi le botlhano a tlhabileng borre ba le bane ka thipa. 

Ramapodise wa Letlhakeng, Supt Michael Maphephu a re mmelaelwa o tlholega kwa Letlhakane mo kgotleng ya Metsiaela. 

A re botlhe ka bone ba tlhabilwe ka nako ya lesome bosigo ka malatsi a a farologaneng, fa go itisitswe kwa sepotong sengwe gone kwa Metsiaela. 

Ramapodise a re a le mongwe, yo o dingwaga di masome mararo le borataro o tlhokafetse morago ga go ragosediwa kwa kokelong ya Letlhakane. 

Yo mongwe o robaditswe ka dikgobalo tse di masisi kwa Nyangabgwe fa yo mongwe a le kwa kokelong ya Orapa mme le ene o a sidilega. 

Wa bone ene o bone dikgobalo tse di potlana. Supt Maphephu a re mmelaelwa o tshwerwe.

Go bolelwa fa mmelaelwa a robaditswe kwa kokelong ya Mahalapye ka e rile a re o le botsa phokoje a kgopiwa,  a wela fa fatshe mme a bona dikgobalo. 

Supt Maphephu a re mmelaelwa o lebisitswe molato wa polao le e meraro ya go gobatsa, mme ditlhotlhomiso di santse di tsweletswe go batlisisa gmodi wa kgang. 

Supt Maphephu o lela ka go re kgotla ya Metsiaela o ka re e tswa mo taolong ka ntata ya bojalwa jwa Setswana.

Le fa go ntse jalo a re ba beile seemo se leitlho e bile ba setse ba simolotse go tshwara diphuthego go ruta batho ka borai jwa go iphetisa dino.  BOKHUTLO