12 Aug 2015

Banni ba Betesankwe mo kgaolong ya Borwa ba kopilwe gore ba nne pelotelele ka jaana ditsha tsa bone di tlaa kwadisiwa ngwaga o fela.

E rile a bua mo phuthegong ya kgotla ee neng e buisiwa ke Tona wa Dikgaolo le Tlhabololo Magae, Rre Slumber Tsogwane, bosheng, mokwaledi wa lekgotla le lebotlana la kabo ditsha la Maokane, Mme Tebogo Malane a tlhalosa fa ba le mo thulaganyong ya go kwadisa ditsha tsa motsana oo.

A re tiro ya go nna jalo e sale e simolotse morago ga gore Betesankwe a tlhomamisiwe semmuso mme a tlhalosa fa kwadiso ya ditsha e ka seka ya diragala ka ponyo ya leitlho ka jaana gona le dithulaganyo tse di tshwanetseng go salwa morago.

A re ba tshwanetse ba dira moalo o o tlhalosang tiriso ya lefatshe ka go farologana, mme ba tlhoka thuso ya morafe go dira jalo. 

A re mo bogompienong ba emetse phetolo ya morafe gore ba eletsa motse wa bone o ka kgaoganngwa jang le gore o gole jang.

O boletse fa dilo tse tsotlhe di tshwanetse go feta ka dikomiti tse di maleba, mme a solofetsa gore go kwadisa ga ditsha go tlaa simolola pele ga ngwaga ono o wela.

O ne a supa fa e rile morago ga go tlhomamisiwa ga motse ba kwala maina a batho ba ba neng ba le foo, ka jalo go ise go nne le itemogelo ya gore bangwe ba ne ba tla kwa morago.

Mme Malane o ne a tsibogela matshwenyego a batho ba Betesankwe ka ba ne ba tlhalosa fa kwadiso ya ditsha tsa bone e diega.

Ba ne ba tlhalosetsa tona gore tiego eo e tlaa feletsa e dira gore bangwe ba basha ba tle go thibelela kwa motseng oo, mme e re kgabagare ba lekgotla la kabo ditsha ba sitege go dira tiro ya bone. BOKHUTLO