26 Jul 2015

Ammaaruri phokoje go tshela yo o dithetsenyana.

Se, se rurifaditswe ke banana ba Tshokwe ba ba inaakantseng le
tiro ya go suga matlalo le go roka dibeke le mabante.

Mo potsolotsong, Mme Lentetsemang Keraetswe wa
madirelo a Tshokwe Tannery o supile fa letlhoko la ditiro le ne la mo pateletsa
go ikopanya le ba ofisi ya boipelego go mo thusa ka madi go simolola kgwebo ya
go suga matlalo le go a rekisa.

O supile fa kopo ya gagwe e ne ya atlega mme ya re ka kgwedi
ya Mopitlwe monongwaga a simolola kgwebo ya go suga matlalo le go a rekisa.

Mme Keraetswe o tlhalositse fa a ne a ikopanya le banana ba
le lesome le bongwe go mo thusa go tsamaisa
kgwebo eo.

A re kgwebo ya gagwe e itebagantse le go suga matlalo le go
a rekisa, go roka ditlhako, dibeke le mabante.

O supile fa ba suga matlalo ka diatla ka ba sena didirisiwa
tse di ka a sugang.

Mme Keraetswe o tsweletse ka go tlhalosa fa ba matlhoko a
leruo ba thusa ka metswako kana melemo e e tshwanang le ya Lime gammogo le
metako e e takang matlalo gore a kgatlhise.

Mme Keraetswe o supile fa ba dirisa matlalo a diruiwa tsa mo
gae go akaretsa dikgomo, dipodi le dinku ka go bo a diphologolo tsa naga ba ise
ba nne le tetla kana setlankana sa go ka letlelelwa go a dirisa.

O supile fa matlalo a ba a rekisang a kile a gapa sekgele
kwa ditshupong tsa Sefophe.

O tlhalositse fa gompieno matlalo ao gammogo le dithoto tse
ba di rokang ba di rekisa mo motseng wa Tshokwe le metse e e mabapi jaaka
Bobonong le Selebi Phikwe ka ba ise ba bone mmaraka.

Mme Keraetswe o supile fa letlhoko la koloi le lone le ba
beile ka fa mosing ka ba sena se ba ka se dirisang go rwala dithoto tsa bone go
ya go di rekisa. Bokhutlo