22 Jul 2015

Mothusa modulasetilo wa komiti ya ditlhabololo tsa Xhumo, Mme Pihelano
Gobotswang, o ngongoregile ka tlhoka tirisano ya banni ba Xhumo le ba
dipalamo tsa setshaba.

Fa a bua mo potsolotsong bosheng, o tlhalositse fa bakgweetsi le bathusi ba bone ba gana go tsena
mo motseng wa Xhumo.

O boletse fa ba ba tlogela kwa ntle ga motse ba bua fa
teseletso ya bone e sa ba letle go tsena ka motse wa Xhumo.

Mme Gobotswang
o ne a supa fa bothata jo ba kopanang le jone mo dipalamong dingwe tsa setshaba tsa
Maun-Gaborone.

O boletse fa go tlogelwa kwa
ntle ga motse go le diphatsa mo banning ka go setse go kile ga nna le dikgang
tsa petelelo, bogodu le go tshosiwa ke ditlou.

Fa a tlatsa, Rre Phillip
Kemelano yo e leng leloko la komiti ya ditlhabololo tsa motse o tlhalositse fa
maitsholo a bakgweetsi ba dibese a sa itumedise.

O boletse fa bakgweetsi ba sa emele bagolo, ba-na-le
bogole, bomme ba ba itsholofetseng le ba ba tshwereng masea go nna fa fatshe
pele fa ba ka kgweetsa. A re go ngomola pelo ka bangwe ba felela ba wela fa
fatshe mme bakgweetsi ba sa supe kutlwelobotlhoko epe morago ga ditiragalo
tse.

O kaile fa le gone kwa maemelong a dibese a a kwa ntle ga motse ba sa pege
batho ba le babedi kgotsa a le mongwe fela mme ba batla ba le bantsi.

Mothusa
modulasetilo o tlhalositse fa dinako tse dingwe ba ema kwa ntle ga motse ba busa
dibese tse di sa tseneng ka motse wa Xhumo gore di tsene mme morago ba ba
duedise.

A re mme lefa go ntse jalo,
fa ba tsene mo motseng ba ema mo maemelong a le mangwe fela mme one a le
mararo.

Mme Gobotswang o supile fa
maitsholo a bakgweetsi ba dibese a ba kgoreletsa go dira dilo tse dintsi ka
gore ba latela ditlamelo le marekisetso ko motseng wa Letlhakane.
A re se se supa fa letshego
la 2016 la tshaba e e babalesegileng le saletse kwa morago ka go folosiwa kwa
ntle ga motse go baya matshelo a bone mo diphatseng. Bokhutlo