22 Jul 2015

Monni mongwe wa Makuta mo
kgaolong-potlana ya Tutume o lebogetse thuso ya mmuso.

Rre Pateletso Tlale ke mongwe wa Batswana ba ba tsibogetseng
mananeo a puso. Ka jalo o ipelafatsa ka motshine o o phothang mabele. Motshine o, o o tsere ka lenaneo la ALDEP ka ngwaga
wa 2008.

Mo potsolotsong bosheng, Rre Tlale yo o itsegeng thata ka
leina la Quarter, o tlhalositse fa puso e mo thusitse go duela motshine o.

A  re ka ngwaga wa 2009, motshine o o ne wa mo tsenya
dingalo ka go senyega, mme ALDEP e ne ya thusa go o baakanya. A re
fa e sa le go tloga yone nako eo, ga o ise o mo tsenye dingalo dipe..

Rre Quarter o tlhalositse fa motshine o o sa thoke sepe
se sentsi ka a ne a tlhalosa fa dilithara tse tlhano tsa leokwane di kgona go
tsaya nako e telele.

O tlhalositse fa a sa direle banni ba Makuta fela
ka jaana a setse a direla ba metse e e gaufi,e akaretsa Matobo le Nswazwi.

Rre Quarter a re ga a kgojwe marapo ke gore motho o kgakala
le ene go le kae ka jaana motshine o pegwa mo kareng ya ditonki go goroga
gongwe le gongwe.

A re ga a ke a tswa ko moreking a sa wetsa tiro
ya gagwe, fa e le sengwe o ka lala a dira bosigo. O ne a tlhalosa fa le go ja a
sa je fa a theogetse, e le yone kgang ya go kgotsofatsa molemi.

A re ka
bogologolo batho ba ne ba photha ka dithobane, go setse ba se kaenyana ba ba
phothang ka tsone, ka jalo motshine wa gagwe o thusa batho ba bantsi.
O ne a tlhalosa fa puso e ntshitse mananeo, mme
lehuma e le lone le le dirang gore motho a atlarele mananeo ao.

Rre Quarter, a re ntateng ya motshine, go na le pharologanyo
e ntsi thata mo botshelong jwa gagwe ka a kgona go jesa bana le bana ba bana ba
gagwe. Bokhutlo