22 Jul 2015

Badiri ba sekole se
segolwane sa Chichi kwa Molapowabojang ba abetse Rre Stix Molomuwatau dijo le diaparo ka Labotlhano.

Morutabana, Rre Althius
Moloi, a re bodiredi jwa sekole bo dule ka mogopolo wa go thusa malwapa a a
tlhokileng lesego fa bana ba sekole ba ya malatsing a boitapoloso.

A re go abela bana dimpho ga se yone tiro fela e ba e dirang
ka jaana ba ithaopa le gone go phepafatsa Molapowabojang le metse e
mabapi.

Rre Moloi a re ba dira se ka jaana ba lemogile
fa e le tiro e e ka thusang Molapowabojang go nna motse o o phepa, ka
jalo a rotloetsa baagi ba motse gore le bone ba tsenye letsogo.

E rile a amogela dimpho, Rre Molomowatau a tlhalosa fa go abela ba ba dikobo dikhutswane e le tiro e ntle mme o ne a rotloetsa gore ba tswelele ba direla ba bangwe ka go sa
itsapa.
Rre Molomuwatau a re o solofela fa botsogo jwa gagwe bo tlaa tokafala.

Kgosi Kedirile Letshabo wa Molapowabojang o lebogile
bodiredi jwa sekole sa Chichi ka tiro e kgolo e ba e dirang, a re go sego
letsogo le le abang go na le le le amogelang.

Mokhanselara wa Molawpowabojang East, Rre Calvin Matlale o
ne a ba eleletsa masego le matlhogonolo gore ba tswelele ka go ntsha maduo a
mantle, a re o itumelela moono o wa kutlwelo botlhoko, ka jaana motho e le
motho ka yo mongwe. Bokhutlo