22 Jul 2015

Banana le bagolo ba dikgwebo tse dipotlana ba rotloeditswe go tsaya kgwebo ka tlhwaafalo le go nna le maitlamo a sennela ruri, a bokopano ja mofuta o o tshwanang le wa go kopanyetsa bagwebi golo go le gongwe go tla go abelana maele ka tsa kgwebo.

Erile a rola mafoko a pulo semmuso ya letsatsi ya bagwebi ba ba botlana e rulagantswe ke ba lekalana la boipelego la kgaolwana ya Palapye Adnministrative Authority mothusa tona mo lephateng la tsa merero ya ga Tautona le bodiralapuso Rre Dikgang Makgalemele a re setlhogo se sa “ Ke mogwebi wa tlhwatlhwa ke a kgona” se maleba ka mo dinakong tseno kgang ke go tswakanya ithsolelo le go nonotsha dikgwebo tse dipotlana.

O ne a supa fa puso le dikhansele di tshwaraganetse go nonotsha bagwebi ba ba botlana ka ditsela tsa mananeo a go lwantsha lehuma le go ba rutuntsha mo go tsa kgwebo.

Bokopano joo ja ditshupo tse dipotlana jo bo neng bo tshwaretswe kwa Moremi mo kgaolong ya Lerala/Maunatlala bo ne bo tsenwe ke bagwebi ba ba botlana go tswa mo metseng e le masome a mabedi le bosupa ba ba neng ba tlisitse disupiwa, bangwe ba tswa mo dikgaolong tsa bo Serowe borwa le bokone.

Mothusa tona o ne a re ke maikemisetso a puso go nonotsha Batswana le go godisa go ikemela mo go tsa kgwebo, le gone go godisa tsa ngwao, go lebeletswe tsa go bopa, tsa petlo, go roka le tse dingwe a re tseo tsotlhe puso e di tshwaraganetse le makalana a a ikemetseng ka maikaelelo a le mangwe a go nonotsha Batswana.

O ne a gatelela seabe sa puso go tlhabolola bagwebi ba ba botlana. A re puso e tshwaragane le ba diposo e tsene mo tumelanong ya gore ba diposo ka boranyane ja sesha ba bapatse dikgwebo tsa banana le ba-na-le-bogole ka ditsela tsotlhe tse ba ka di kgonang kwa mafatsheng a a kwa ntle le gone gore lephata la puso lengwe le lengwe le abetswe P500 000 go mo dirisa mo go rekeleng dikgwebo tse dipotlana ka maikaelelo a go di godisa.

Rre Makgalemele o ne a akgola thata barulaganyi ba ditshupo tseo a re thuto ke yone fela e ka isang Batswana kwa mankalankaleng, ka gore fa ba kopaneng teng ba tlaa abelana boitseanape ja ka fa ba tsweletseng ka teng le ba bangwe, le go nna le sebaka sa go nna le dikitso tse ba ka tlhabololang dikgwebo tsa bone ka teng tse ka tsone ba ka tlotlomatsang lefatshe leno mo go tsa bodiragatsi.

A re mananeo a go neela Batswana dithata tsa itsholelo a dirilwe go lebeletswe go ba nonotsha ka go reka dithoto le ditirelo tse ba di dirang, le gone go godisa dikgwebo tse dipotlana.

O ne a ba rotloetsa go itse go tsamaisa dikgwebo tsa bone le go di godisa ka go di tlhabolola nako le nako ka ditlhaloganyo le ditsamaiso tse disha. Bokhutlo