14 Jul 2015

Moanamisa mafoko wa khansele ya Francistown, Rre Joseph Wasubera o boletse fa mananeo a nyeletso lehuma ka go farologana a tsweletse ka go dira mo go kgatlhisang.

Rre Wasubera o buile jalo mo potsolotsong le BOPA bosheng, a supa fa mananeo a e le nngwe tsela e e tsweletseng ka go dira pharologanyo ka jaana a tokafatsa seemo sa matshelo a ba ba amegang.

A re mananeo ao a akaretsa kapei ya dijo ka go farologana, go roka le ditshingwana tsa merogo.

Rre Wasubera a re banni ba toropo e ba le makgolo mabedi le masome a marataro le bone ba filwe mananeo a ka go farologana ga one e bile a a dira.

A re bangwe ba ikemetse ka bongwe ka bongwe fa bangwe ba dira ka ditlhopha tsa maloko a a sa feteng botlhano.

Rre Wasubera o bile a supa fa baikopedi ba le lekgolo, lesome le botlhano le bone ba filwe bontlha bongwe jwa didirisiwa tsa mananeo a ba a ikopetseng.

A re go na le tsholofelo e e nametsang gore ba tlaa fiwa didirisiwa tse di saletseng kwa morago mo nakong e e sa fediseng pelo ka jaana khansele e dira ka gotlhe go netefatsa gore tsotlhe di apare tshiamo.

Rre Wasubera o bile a supa fa mananeo a a tsweletse ka go gola ka jaana go gorogile a mangwe a masha, a re lengwe la one ke la go adimisa dipitsa.

A re bontsi jwa batho ba supile kgatlhego ka jaana ba le masome marataro le botlhano ba le ikopetse e bile ba setse ba filwe didirisiwa tsotlhe tse ba di tlhokang. BOKHUTLO