12 Jul 2015

Mogolwane wa madirelo a dijo a Grinos mo Palapye, Mme Christinah Ngwako o 
abetse bana ba ba kobo dikhutswane ba sekole se se botlana sa Kediretswe cheke
 ya P10 400 go a dirisa mo mosepeleng wa thuto.

Mme Ngwako ke mongwe wa
batsadi ba ba utlwileng mokgosi wa ga Tautona wa go thusa bao ba ba tlhaelang,
ka go abela sekolo sa Kediretswe a itebagantse segolo bogolo le bana ba kobo
dikhutswane.

O ne a itlama go thusa bana
bao ba ba lesome le boraro dingwaga tse tharo ka go thomagana go simolola ka
2015 go fitlhelela ka 2017, a bo a diragatsa maitlamo ao ka go baya monwana mo
mokwalong o a o tlogetseng le botsamaisi ja sekolo se se botlana sa Kediretswe.

O ne a tlhalosa gore tirisano
mmogo le sekolo sa Kediretswe e simologile ka ngwaga wa 2013 fa a ne a abela
sekole seo P2 500 le dino tsididi go rutuntsha bana go dira ka thata mo
dithutong tsa bone.

A re o ka kgona go tswelela le dithuso ka kemo nokeng ya
batsadi le bone barutabana mo tlhokomelong ya bana bao.

Mme Ngwako a re o gwetlhilwe ke letshego la tebelopele ya
Botswana le le reng tshaba e e kutwelobotlhoko e e ratang tshiamo e e ratang
batho botlhe le lorato le a nang le lone mo baneng.

A re “kgetsi ya tsie e
kgonwa ke go tshwaraganelwa” ebile ke keletso ya gagwe go bona mongwe wa bana
bao a na le boikarabelo mo setshabeng go tlhabolola lefatshe leno.
Mo mading ao ngwana mongwe le
mongwe wa ba ba lesome le boraro o ya go duelelwa P800 wa mosepele.

O ile a
leboga Modimo go bo o mo neetse kgwebo e ka yone a kgonang go ijesa le ba
lelwapa la gagwe, le gone go sa itebeng a le nosi mme a bona gore a kgaogane
tlhogo ya tsie le ba bangwe, ka e le motsadi gape e le mme, ka maikaelelo a
gore ka moso ba kgone go ithusa le ba malwapa a bone.

E rile fa a mo kgwa dikgaba
raboipelego wa khansele-potlana ya Palapye Rre Teme Molefe a lebogela lorato le
Mme Ngwako a le fileng bana ba, a tlhalosa fa khansele e sena madi a a lekaneng
go thusa bana ka madi a mesepele ya dikole, a re batho ba ba tshwanang le mme
Ngwako ba a tlhokwa mo lefatsheng la Botswana.

A re seo se tlisitse
boitumelo mo baneng ka jalo o ne a kopa morafe go ba thusa go tshwaraganela
bana ba ka thuto e le boswa. Bokhutlo