02 Jul 2015

Banni ba Khudumelapye mo kgaolong potlana ya Letlhakeng ba supile fa ba sa itumelele komiti ya ditlhabololo.

Ba buile seo kwa phuthegong ya kgotla e neng e tshwerwe go rola pego le go tlhopha komiti e ntsha ya ditlhabololo.

Mongwe wa banni bao, Rre Mafoko Dingaka, o ne a supa fa komiti eo e ne e sena therisanyo le bogogi jwa motse fa go tla mo go rekiseng didirsiwa tse di neng di sala morago ga go fediwa ga ditiro.

O ne gape a supa fa pego e e rotsweng e le lolela ka e sa tlhalosa gore komiti e dirileng ka letseno la bone la madi.  O ne gape a supa fa komiti eo ene ya palelwa ke go tla ka maano a go itirela letseno la madi.

Rre Lenna Ooke ene o ne a ngongoregela gobo komiti e sa bua sepe ka ntlo lehalahala ya Khudumelapye. O kaile fa e sa tlhokomelwe, matlwana a boiteketso ga a lebege,ga gona metsi teng.

O supile fa ntlo lehalahala e tshwanetse ya lebega ka go tshwarelwa ditiro tse dintsi teng.Motshwaramadi wa komiti eo Mme Baiketlile Nkwane o ne a supa fa ban a le matlo a le lesome le botlhano. Mme a supa fa ale lesome ale mo tirisong. O kaile gape fa matlo a a nang le motlakase ale mane.

O supile fa ntlo ee nang le motalakase ba e hirisa ka P130 mme e e senang motlakase ke P70 kaile fa bana le ditilo di le lekgolo le bongwe.Mme a supa fa setilo sele sengwe ba se hirisa ka P1.50.

One gape a supa fa kolotiwa madi a a kanang ka P6 000 a phiriso ya matlo gotswa ngogola ka kgwedi ya Moranang.

Modiri wa boipelego Rre Meshack Mokgolele o supile fa komiti e ncha e e tla tlhophiwang e tla dira tumalano ya mokwalo le bahirisi.

O kaile fa seo se tla thusa gore fa bahirisi bas a duele batla kgona le go tseelwa dikgato tse di maleba ke mmueledi wa khansele.

O ne a supa gape fa g ofetotswe ditsetlana dingwe mo tlhophong ya komiti eo. BOKHUTLO