24 Jun 2015

Batho ba le babedi ba latlhegetswe ke matshelo mo kotsing ya koloi fa ba bangwe ba le babedi ba bone dikgobalo tse di masisi.

Mogolwane wa mapodise a Letlhakane, Superintendent Albert Foda o supile fa kotsi eo, e diragetse ka Mosupologo maitseboa ka nako ya bosupa mo tseleng ya Francistown/Orapa.

Supt Foda o tlhalositse fa koloi ya modiro wa Toyota Pajero e ne ya pitikologa morago ga gore mokgweetsi wa yone a latlhegelwe ke taolo. A re ba ba tlhokafetseng ke mme le rre ba dingwaga tse di magare ga masome a mararo le masome a mane le botlhano.

Ba ba bonyeng dikgobalo tse di masisi e le mme le rre ba dingwaga tse di fa gare ga masome a mabedi le botlhano le masome a mararo mme ba robaditswe kwa kokelong ya Nyangabwe kwa Francistown.

Supt Foda o boletse fa mokgweetsi wa koloi a bone dikgobalo tse di potlana mme a robaditswe kwa kokelong ya Letlhakane. A re le ntswa ba sa itse se se bakileng kotsi e, ditlhotlhomiso di santse di tsweletse. Supt Foda o kopile bakgweetsi go nna ba kgweetsa ka kelelelo ka nako tsotlhe. Bokhutlo