23 Jun 2015

Bogogi ba Tobela mo Kgaolong ya Mahalapye bo supile fa tiego ya go duela barui ba ba rekisetsang lenaneo la LIMID dihutshane le kgoreletsa lenaneo go atlega.

Fa a bua mo potsolotsong bosheng, Kgosi Major Mphoyakgosi Kgotlayame o thalositse gore barui ba ba saleng ba rekisetsa lenaneo la LIMID dipudi ka Tlhakole ba isi ba duelwe ntswa baikopedi bone basa bolo go amogela dihutsane.

Seemo seo o boletse fa se sutisa lehuma go tswa mo baikopeding ba LIMID go ya ko baruing ba ba rekisetsang lenaneo leo, o tlhalositse fa baikopedi ba bangwe ba tshwanetse go fiwa dihutshane mo nakong e e gaufi mme barui ba sena maikaelelo ago rekisetsa lenaneo leo dihutshane.

Go sale foo Kgosi o tlhalositse fa mananeo a nyeletso lehuma a amogetswe sentle mo motseng wa Tobela, bogolo jang mananeo a a sa tlhokeng ditlamelo di tshwana le motlakase le metsi jaaka Ipelegeng le thuo ya dihutshane.

O boletse fa motse wa gagwe ona le tlhaelo ya metsi,gape o sena motlakase, seemo seo o bolelela fa se rontsha banni ba motse wa Tobela go akola mananeo a a tlhokang metsi jaaka masingwana a morogo.

Le fa go ntse jalo Kgosi one a opela lenaneo la Ipelegeng legofi go bo le thusa banni ba motse wa gagwe, o boletse fa banni ba sa tlhole ba wela mo isong, one a tswelela ka go akgola batsamaisi ba Ipelegeng go bo ba duela badiri ka nako, o boletse fa banni ba telwa dikatso tsa bone mo Tobela malatsi ale mararo go fitlha ale mane morago ga go hetsa go bereka.

Mo go tse dingwe Kgosi Kgotlayame o supile fa a sa itumelele tiriso botlhatswa ya nno-tagi mo motseng wa Tobela.

O boletse fa seemo seo se gakadiwa ke barekisi ba bojalwa jwa setso ba ba sa obameleng dinako tsa go tswala marekisetso a bojalwa, o tlhalositse fa gantsi banwi ba bojalwa ba setso ba felela ba lwa kana ba dirisa matlhapa morago ga go itontela nno tagi.

Go tsibogela seemo seo Kgosi o tlhalositse fa a tsamaya mo motseng le maloko a tlwantsho borukhuthi ba gwetlha barekisi ba bojalwa jwa setso go tswala ka nako le ntswa maiteko a bone a sa tswe tema nako tse dingwe ka gore maloko a tlhwantsho borukhutlhi ga bana ditlhata tsa go tshwara badira molato, o boletse fa motse wa gagwe oka kgonwa ke mapodisi, one a kopa puso gore bogolo e tsise lepodise le le lengwe le tego theogelela mo motseng wa gagwe.

Kgosi Kgotlayame gape o supile fa letlhoko la sekolo se se botlana mo motseng wa Tobela le baya batsadi le baithuti mo mosing, o tlhalositse fa baithuti ba ba nnang mo motseng wa Tobela ba tsena dikolo tse di mo metseng e e mabapi e bong Shoshong le Mahalapye.

Kgosi o tlhalositse fa baithuti ba ba mo motseng wa Tobela ba le masome a mabedi le botlhano ba tlamega go tsoga makuku malatsi otlhe le mo marigeng tota baya go emela dipalamo gore ba ye sekolong, o thalositse fa batsadi ba dirisa madi a mantsi go pega bana ba bone gore ba kgone go tswelela ka dithuto tsa bone.

O tlhalositse go ntswa motse wa bone o tlhomamisitswe go nna motse bosheng ka 2007 ba bata ditlhabololo tse dintsi mme thabololo ya konokono e ba e batang ke ya sekolo se se botlana. Bokhutlo