12 May 2015

Mogolwane wa tlhabololo matshelo a batho, Mme Lilian Ntopolelang, go tswa kwa khanseleng ya Kgalagadi o gwetlhile bagwebi ba ba botlana go ema ka dinao go itirela ka diatla  ka seo se ka thusa thata mo go tlhabololeng matshelo a bone  le go itshetsa.

O buile mafoko a bosheng mo letsatsing la Thekiso” Market Day’” mo Tsabong   le ba ne neng ba rulaganyeditse bagwebi ba ba botlana le ba ba thusitsweng ka mananeo a nyeletso lehuma,  ba  ditiro tsa diatla ba akaretsa ba Thuto Gaegolelwe le ba ba bangwe.

Mme Ntopolelang o ne a tswelela ka go tlhalosa fa maikaelelo a letsatsi leo e le go rotloetsa botlhe ba ba inakantseng le dikgwebo tse di potlana le ba ba thusitsweng ke puso ka lenaneo la nyeletso lehuma go  tokofatsa matshelo a bone.

O tlhalositse fa maphata a puso aa farologanyeng a akaretsa  la boipelego, la bong,  temo thuo, ba banana metshameko le ngwao le ba bangwe e le one a rotloetsang bagwebi bao. 

Mogolwane o ne a gakolola borre go  inaakanya le ditiro tsa diatla ka bomme  e le bone ba gantsi ba kgatlhegang ka go itshupa ka dipalo tse di kwa godimo fa go tshwantshwangwa le borre tse  di leng kwa  tlase fela thata. 

Mme Ntopolelang o ne a supa fa bontsi jwa bomme ba na le ditalente tsa ditiro tsa  diatla mme  sebe sa phiri e le gore bomme ba bangwe  bone ga ba  tlhwaafalele  go dira ka natla , a supa fa puso e leka ka bojotlhe go tokofatsa matshelo a bone  ka go ntsha mananeo aa farologanyeng a ba ka itshetsang ka one.

O ne a tswelela ka go tlhalosa fa letsatsi leo le tshwanetse go tshwarwa beke le beke mme ba sa kgone ka lebaka la letlhoko la  dipalamo ka kgaolo ya kgalagadi borwa e le bophara, a kaya fa  ba tshwanelwa ke go kokoanyatsa  bagwebi bao go le gongwe   ba ba tswang kwa Struizendam go fitlha kwa Kokotsha.

A re gantsi dikgwetlho tse bagwebi ba kopanang le tsone ke  theko ee  kwa tlase mo dikgaolong fa go tshwantshwanngwa le kwa ditoropong.

Mme Ntopolelang o kaile fa  keletso ya bone e le gore  mo nakong ee tlang ba rulaganyetse bagwebi go tshwarela letsatsi leo  la theko kwa toropong e tshwana le  ya Jwaneng ka seo se ka dira pharologanyo ya theko ee botoka bogolo jang mo mafelong a kgwedi.

O ne a kaya fa maikaelelo a bone e le go rotloetsa bagwebi ka go ba fa sebaka sa go rekisa fa  bathong ba le bantsi  ba ba kokoanetseng   mo  meletlong  e tshwana le ya Khawa Dune Challenge, Polka Festival, ditshupo tsa temo thuo le meletlo e mengwe ee diragalang mo kgaolong ya kgalagadi. 

Lefa go ntse jalo mongwe wa bareki Mme Kganetso Kavari o ne a ngongorega ka barulaganyi ba letsatsi leo a kaya fa  gantsi ba sa itsisise le go laletsa   setshaba   ka letsatsi leo , A supa  fa e le lebaka lengwe le le dirang gore bagwebi bao  ba nne le theko ee sa nametseng. 

Mme Evah Motlhanke mongwe wa mogwebi o ne a tlhalosetsa   ba lekalana la dikgang la (BOPA)  fa a dira kofi ya lengangale a kaya  fa e na le theko ee  nametsang  fa e sale jaaka a simolola go e  rekisa ngogola.  

Are fela jaaka kofi  motlopi le yone e thusa thata  mo  malwetsing a tshwana le  madi a matona le jwa  sukiri le a mangwe.

Mme Motlhanke o ne a gatelela thata mafoko a ga Mme Kavari a supa ka monwana barulaganyi ba letsatsi leo a kaya fa  ba sa laleletse setshaba gotlhelele selo se a reng se dira gore le seka la ba solegela molemo ka go tlhoka go  rekwelwa dithoto tsa bone ka fa go tshwanetseng ka teng. 

Letsatsi leo le ne le tseneletswe ke bagwebi ba bomme ba le lesome le bosupa fa borre bone ba ne ba le babedi fela go tswa mo kgaolong ya kgalagadi borwa. BOKHUTLO