20 Apr 2015

Mothusa tona wa merero ya ofisi yaga tautona le bodirelapuso, Rre Phillip Makgalemele, a re ka ntlha ya matshwenyego a tlhaelo ya boroko jwa badirelapuso ke sone se palamente e dumelaneng mogopolo wa goletlelela dibanka go adima makgotla a ditlhabololo le Batswana ka bongwe ka bongwe madi a go aga matlo a ka hirisetswang badirelapuso.

Rre Makgalemele o boletse mo phuthegong ye a neng a e kopanetse le badirelapuso ba metse ya Poloka le Mokgenene ka laboraro wa beke eno gore ere ka jaana mmuso o haraherwe ke ditiro e bile o tlhaelelwa ke madi ke sone se ba tsereng tshwetso ya go dumelanana mogopolo wa go letelela dibanka go adima Batswana le makgotla a ditlhabololo madi go aga matlo a b aka gwebang ka one.

A re maiteko mangwe a dirilweng go rarabolola kgang ya tlhaelo ya boroko jwa badirelapuso mo dikgaolong ke molao o dumelanweng ke palamente e sa tswang go khutla, o letelelang badirelapuso go adima madi a lenaneo la SHHA go ikagela matlo le go simolola go duela badiredi ba puso madi otlhe a kgwedi fa ba ile dithutong goya go ikoketsa dikitso gammogo le go letelela badirelapuso go itlhamela dikgwebo tse e kareng kgabagare ba iphimola dikeledi ka tsone fa ba tlogela tiro ka bogodi.

Rre Makgalemele yo e bileng ele mopalamente wa Shoshong o tsweletse ka go tlhalosetsa badirelapuso bao fa itumedisitswe ke tirisano mmogo le neelano e dirilweng ke baemedi ba makgotla a babereki le baemedi ba lephata la khiro ya badirelapuso mabapi le kgang ya go okeletsa babereki dituelo ka 6% mo lekgolong ka jaana di sa nna le dikgogakgogano.

E rile batsena phuthego eo batswa la bone ba itumelela bokopano joo k aba kgonne go ntsha dingongorego le matshwenyego a bone jaaka go berekela mo lefelong le le lengwe dingwaga ngwaga, go tlhoka go tlhatosiwa maemo, go tlhoka go duelwa madi a batho ba ba berekelang kwa metseng ya tennyanateng

(RASA) ntswa go sena ditlamelo ditshwana ditsela, mabenkele, dibanka, motakase le ditlhaeletsano.

Ba boleletse mothusa tona fa ba itumedisitswe ke dithuso tsa madi tse ba di abetsweng ke mokwaledi yo haphegileng wa ga tautona Brigadier Goerge Tlhalerwa ba bolela fa madi ao a tla dirisiwa go duela morutabana wa sekole sa bananyana ba ba iseng ba simolole mophato wa ntlha. BOKHUTLO