07 Sep 2017

Lekgotla la dikereke tsa semowa la Organisation of African Instituted Churches (OAIC) le ikaelela go tla ka molawana o o laolang boitshwaro jwa baruti le baporofiti.

Fa a bua mo phuthegong ya bagogi ba dikereke tsa semowa ba kgaolo ya Palapye le Tswapong, moeteledipele wa lekgotla le, Rre Tebogo Motlhagodi a re o ikaelela gore ngwaga o o tlang ba bo ba dirile molawana o o laolang boitshwaro jwa baruti le baporofiti ba dikereke tsa semowa.

A re o kopile bangwe ka ene kwa Rwanda le Mauritius gore ba mo thuse go dira molawana oo.

Rre Motlhagodi a re baeteledipele ba dikereke ba tshwanetse go itshwara sentle gore ba seka ba goga maina a dikereke tsa semowa tse ba di eteletseng mo seretseng.

A re baruti ba bangwe ba dikereke tsa semowa ba kgokgontsha maloko mo go dirang gore maloko a sie mo kerekeng.

Le fa baruti ba na le taolo mo dikerekeng tsa bone, Rre Motlhagodi a re ba tshwanetse go dirisa marapo a bone sentle.

A re ba seka ba utlwisa maloko botlhoko ka ditsamaiso tse di sa ba itumedisiseng a ba kgothatsa go nna le merero le tirisano mmogo.

Mo go tse dingwe a re o tshwenngwa ke gore dikereke di kerekela mo malapeng e le ka mabaka a go tlhoka ditsha.

A re tse dingwe di tlhoka mafelo ka mabaka a go thubega gantsi mme lefatshe lone le seyo.

Rre Motlhagodi a re ba tsweletse le go bua le tona wa ditsha gore fa ditsha di ajwa dingwe e nne tsa kereke.

Fa a bua ka tshenyetso setshaba mo dikerekeng a re tshenyetso setshaba ke mmaba wa bofelo yo o tshwanetseng go nyelediwa ke kereke le setshaba gongwe le gongwe ka gore e phuphamisa itsholelo ya lefatshe.

A re kereke ke nngwe ya makalana a a amilweng ke tshenyetso setshaba, a tlatsa ka gore nako tse dingwe baruti ba raelesega go itirisetsa madi a phuthego go sena morero.

Rre Motlhagodi a re fa kereke e sa duedise fa e sena go alafa molwetse, ope ga a tshwanela go duedisa go alafa bolwetse.

Modulasetilo wa komiti ya lekalana la dikereke tsa semowa kwa Palapye, Rre Moseki Otukile a re komiti ya gagwe ga e tsamaye sentle ka lebaka la go tlhoka tshwaragano.

A re fa e sale komiti e tlhophiwa ga e ise e dire sepe, selo se a reng se a tshwenya.

Rre Otukile a re mo gongwe dikereke di iphitlhela kwa makgotleng a ditsheko ntswa lekgotla la dikereke tsa semowa le le teng le ka bo le ba file kgakololo.

A re dikereke tsa semowa di tshwanetse go dirisa lekgotla la bone ka nako tsotlhe.

O kopile maloko a dikereke tsa semowa go emisa go kgala dikereke tsa pholoso, a re ba rapela Modimo o mongwe fela.

A re nako e tsile ya gore dikereke tsa semowa di bereke ka kutlwano le tsa pholoso go tlhabolola matshelo a balatedi. Ends