04 Sep 2017

Mme Tsiane Mosielele wa kgotla ya Manke kwa Gabane ke mongwe wa Batswana ba ba itirelang ka diatla tsa bone go itshetsa le go inamola lehuma.

Mme Mosielele o itshidisa ka go loga dibaga.

Fa a bua mo potsolotsong, o tlhalositse fa go ipelega e le selo se se botlhokwa mo botshelong.

A re puso e ka seke e thuse mongwe le mongwe, mme go ka nna botoka fa e thusa ba ba sa kgoneng gotlhelele.

A re o simolotse go loga dibaga ngogola mokgatlho wa WENA (Environmental Education and News Trust) go tswa Gaborone o sena go ba fa dithuto tsa go loga dibaga.  

A re o ne a nna le kgatlhego e tona mo go tsone, a tlhalosa fa gompieno e le mmantswitswidi wa go loga dibaga, e bile a ikgantsa ka tsone.

Mme Mosielele yo o dingwaga di masome marataro, o tlhalositse fa a ne a sa itse sepe ka go loga dibaga, ka jalo o lebogela WENA go mo namola lehuma.

O buile fa mokgatlho o, o ne o ba ruta go loga dibaga ntle le dituelo dipe lobaka lwa malatsi a mararo. A re ba ne ba rutwa go loga dibaga, go di kgabisa ka dilo tse di farologaneng gore di kgatlhe.

A re ba rutilwe go loga dibaga ba le bantsi mo Gabane, mme phadisanyo ga e ntsi ka gore bontsi jwa bone ba tlogetse.

O tlhalositse fa kgwebo nngwe le nngwe e tlhoka lorato gore e gole. O boletse fa a itumile molomo wa tlase go godisa kgwebo ya gagwe gonne a lemogile fa e ka mo tlodisa dinoka di tletse.

Mme Mosielele yo e leng motlhokomedi wa bana ba batlhano, o buile fa e sale a simolola go loga dibaga, botshelo jwa gagwe bo fetogile fela thata.

Ka takataka a sa tshwane le tshoo! Mme Mosielele o buile fa lemmenyana le a le bonang a reka motlakase, a tlhokomela bana, a ithekela le tsone dijo.

Mme Mosielele a re o dirisa maungo a ditlhare tse di farologaneng jaaka mogorogorwan, mogonono, jakaranda, mmilo, letlape la namuni, sekgatlapana sa chibuku le panaki ya lebotlolo go kgabisa.

Le fa go loga dibaga go tshedisa Mme Mosielele, o tlhalositse fa a sa loge dibaga go di rekisa fela, a re gape go lwantsha bodutu.

O tlhalositse fa bontsi jwa dikgwebo di phutlhama ka gore beng ba tsone ga ba na lorata mo go tsone.   A re bopelotelele le maikaelelo ke tsone di godisang kgwebo.

Fa a bua ka dikgwetlho, a re bareki ba lela ka ditlhwatlhwa ba re di kwa godimo, a tlatsa ka gore didirisiwa tsa go loga dibaga le tsone di turu. O tlhalositse fa a reka didirisiwa kwa Gaborone.

A re le fa a ralala dikgwetlho, o dira ka natla go godisa kgwebo ya gagwe. O rotloeditse Batswana go nna le mowa wa go itirela ka diatla, a tlatsa ka gore motlhopha ntsi ke yo o kgorang, a tlhalosa fa gompieno a kgabisa dibaga tsa gagwe ka di bapalwanageng.

O buile fa sengwe le sengwe se ka namola batho mo lehumeng, mathata e le gore batho ba emetse puso go ba direla.

Mme Mosielele o buile fa e le leloko la komiti ya ditlhabololo tsa motse gape a bereka Ipelegeng.

O rotloeditse banana go tlhoafalela dithuto tsa bone gonne thuto ke lesedi e bile ke phenyo.

O boile gape a rotloetsa banana go emisa go dirisa ditagi le go nwa bojalwa phetelela ka gore ga di a siamela mebele ya bone ebile gape di senya isago ya bone.

O ba kgothaditse go ipetlela tsela ya botshelo nako e santse e le teng gonne botshelo bo tletse dikgwetlho. BOPA