09 Aug 2017

Diphuthego tsa Sekeresete le ba tumelo ya Islam ba ne ba isa matshediso kwa go ba lelwapa la ga tautona wa pele, Sir Ketumile Masire bosheng.

E rile a rola mophuthelwana oo, o tlhotlhwa ya one e sa tlhalosiwang, modulasetilo wa lekgotla la baruti kwa Kanye, Moruti Koolopile Pema a re maikaelelo e ne e le go tlotla Sir Ketumile le go leboga Modimo go bo o ne o ba file mogaka yo o tshwanang nae gore a tshele nabo a bo a nne moeteledipele wa bone.

A re Batswana ba tshwanetse go ipelela gore Sir Ketumile o busitse lefatshe leno ka kagiso le lorato, a re segolo bogolo o gopola nako e lefatshe leno le neng le tshwere phage ka mangana ka nako ya kgang le la Namibia mabapi le setlhaketlhake sa Sedudu.

Moruti Pema a re bobelonamagadi jwa ga Sir Ketumile bo ne jwa dira gore kgang eo e fele ntle le tshololo ya madi, selo se a reng e le baeteledipele ba diphuthego ba ne ba se lebogela thata.

Moruti Pema a re ba gopola gape Sir Ketumile ka nako e puso ya Aforika Borwa ya tlhaolele e neng e tlhasela batshabi ba lefatshe leo ba ba neng ba tshabetse masula a tlhaolele mo lefatsheng leno, pele ga lefatshe la bone le ipusa ka 1994.

A re Sir Ketumile ga a ise ake a ipusolosetse, selo se a reng se ne sa babalela kagiso le thokgamo.

Moruti o ne a akgolela Sir Ketumile go bo a ne a bolotsa ntwa kgatlhanong le bolwetse jwa HIV/AIDS ka nako e bolwetse joo bo neng bo feditse setshaba.

A re puso ya gagwe e ne ya isa baeteledipele ba dikereke go ya go tsaya malebela kwa Uganda.

A re go dira jalo, Sir Ketumile o ne a jwala peo.

E rile a amogela mophuthelwana oo kgaitsadia Sir Ketumile, Mme Gaolengwe Koma a lebogela lekgotla la baruti tiro eo ya bobelonomi a ba a supa fa a tlaa o fitisetsa kwa baneng ba gagwe.

Mo boemong jwa motsadi, Rre Motswakgakala Sealetsa, a re se lekgotla le se dirileng ke yone konokono ya phuthego ya Modimo.

A re phuthego ya Modimo ke go gomotsa le go fa ba ba latlhegetsweng tsholofelo ya gore go na le botshelo morago ga loso.

A re kereke gape e tshwanetse go aga motho gore a itshetlele mo maikutlong le mo tlhaloganyong le go itse gore bontle jwa motho ga bo mo diaparong bo mo boitshwarong.

Rre Sealetsa o ne a akgola Ofisi ya ga Tautona, lekgotla la ditshabatshaba, Batswana le mongwe le mongwe yo o neng a ba eme nokeng ka nako ya khutsafalo, a ba a kopa maitshwarelo fa go ka neng go fosegile teng ka nako ya dipaakanyo tsa tirelo ya phitlho. BOKHUTLO