09 Aug 2017

Setopo sa rre wa dingwaga tse di masome mararo le bongwe se fitlhetswe se senyegile morago ga gore ba masika ba begele mapodisi kwa Maun fa rre yoo a sa bonwe.

Se se rurifaditswe ke mothusa mookamela mapodisi a Maun, Assistant Superintendent Chenamo Orateng mo potsolotsong le BOPA.

Assistant Superintendent Orateng a re e ne ya re go amogela pego gore rre yoo ga a bonwe, ba fitlhela mmele wa gagwe o akgega mo setlhareng kwa morakeng wa Maphane gaufi le Maun.

“Ba masika ba re boleletse fa ba bone moswi la bofelo Phukwi a tlhola lesome le bosupa mme ra tswa letsholo go ya go mmatla ra mmona kgwedi eo e tlhola malatsi a le masome mabedi le bosupa,” Assistant Superintendent Orateng a tlhalosa.

A re mmele wa ga rre yoo, yo o tlholegang kwa kgotleng ya Botshabelo kwa Maun, o ne wa bonwa ke mofeti le tsela mme a begela mapodisi.

O tlhalositse fa ba ne ba tabogela kwa lefelong leo mme ba fitlhela mmele wa gagwe o senyegile.

A re ba ne ba bitsa masika ba ba neng ba rurifatsa fa e le ene yo ba ntseng ba mmatla.

Assistant Superintendent Orateng a re ba ne ba mo fitlhela gone fa lefelong la tiragalo morago ga gore a tlhatlhojwe ke ba bongaka mme ba supa fa dikarolo tsotlhe tsa mmele di le mmogo.

Rre Orateng o ganeditse magatwe a a tletseng mo mebileng a gore rre yoo o fitlhetswe dikarolo dingwe tsa gagwe di bapetswe.

O ne a gakolola batho gore se seka sa itseela botshelo ka gore seo ga se rarabolole sepe.

A re fa batho ba na le mathata ba itekodise masika, mapodisi le ba boipelego go ba thusa go a rarabolola. BOKHUTLO