20 Jul 2017

Morafe wa Bakwena o tsere tshwetsho ya go bopa lekoko go latedisa dikgang tsa magatwe tse di tshwenyang morafe di ama go tlosolosiwa ga ditlhabololo dingwe kwa Molepolole.

Tshwetso e, e tserwe mo phuthegong ya kgotla e e neng e buiisiwa ke mopalamente wa Molepolole Bokone, Rre Mohammed Khan le wa Molepolole Borwa, Dr Tlamelo Mmatli ka Laboraro.

Tshwetso e, e ne ya tsewa morago ga tekodiso ya mapalamenete ao, ka go supa fa go sena kgatelopele ka seemo sa go tlhabologa ga Molepolole.

Magatwe a, a ama ditlhabololo tse di neng di tshwaetswe kgaolo eo di akaretsa mesele e e laolanag metsi, kgopho ya metsi a a leswe, kago ya diofisi tsa sepodisi le go tokafatsa seemo sa metsi mo motseng.

Mopalamenete Khan a re Molepolole o felela a salela kwa morago ka ditlhabologo ka mabaka a go faposiwa ga madi a ditiro tsa ditlhabololo tse di abong di tshwanetse go diragadiwa.

A re go sa tlhabologa ga Molepolole go beile morafe wa Bakwena ka fa mosing a supa fa ditiro di tshwana le kago ya matlo a Botswana Housing Coperation (BHC) a le 258 e emisitswe ke dikgang tsa kgopho ya metsi a a leswe ka go tshaba boturu jwa go duela dikoloi tse di a rwalang.

Le fa go ntse jalo, Mopalamenete Mmatli o lekodisitse fa ba ntse ba tsweletse ka maiteko a go latedisa dikgang tseo mme go sena kgatelopele ntle le tsholofetso ya kago ya diofisi tsa sepodisi e go tweng e mo thulaganyong ya go agwa ka 2022/2023.

Matshwenyego a mapalamnete a ne a iteelwa kobo moroko ke dibui ka go farologana ba ngongoregela gore Molepolole o ikgatholositswe ka lobaka e bile Bakwena ga ba reediwe.

Ba re gangwe le gape madi a a tshwaetsweng go tlhabololola motse wa bone a abelwa metse e mengwe e yone seemo sa yone sa ditlhabololo se nametsang.

Mongwe wa banni e bile el e mokhanselera wa pele, Rre Rex Motsweneng, a re seemo sa ditlhabololo ke kgang e e tswang kgakala.

O gateletse botlhokwa jwa go tlhongwa ga lekoko go lebagana le puso ka selelo sa Bakwena.

Rre Pako Kookile o kopile gore a lekoko le thongwe ka boitseanape jwa dikitso tse di farologanyeng go balelwa le mangwe maloko a Council of Elders.

Ba ne ba supa fa go hakgamatsa gore motse o e leng one o mogolo go e feta yotlhe o bo o kgaphetswe ntle ka ditiro tsa ditlhabololo tse di supegang fela mo mokwalong go tswa ka ditogamaano tsa setshaba tsa bosupa, go fitlha tsa lesome le motso mme go sa diragale sepe.

Mo tekodisong ya gagwe ka seemo sa ditlhabololo tsa motse, modulasetilo wa komiti ya ditlhabololo ya umbrella, Mme Tuduetso Kablay, ga a a farologana ka gope le selelo sa morafe ka seemo sa ditlhabololo.

O ne a kopa ba ba lebanyeng go tsibogela seemo sa matlotla a a phuagantsweng mo gare ga motse ka a rotloetsa borukutlhi. BOPA