08 Sep 2016

Banni ba Sekoma mo kgaolong ya Borwa ba tshwere ka natla mo go netefatseng gore boipuso jwa monongwaga bo tlaa nna pharologanyo.

Kgosi Kekailwe Tefiso o kaile fa ba gatetse pele mo dipaakanyong, a tlhalosa fa ba setse ba kgonne go aga ntlo ya Setswana kwa kgotleng e maikaelelo a yone e leng go ikgakolola botshelo jwa pele jwa Setswana.

O ne a kaya fa le ditlhopha tse di tlaa bong di natetsha e bile di ruta ka ngwao ya Setswana le tsone di setse di bonetse. 

Kgosi Tefiso o tlhalositse fa go tlaa nna le metshameko ya Setswana e bagolo ba motse ba tlaa bong ba e tsene, a kaya fa go dira jalo e le maikaelelo a go ruta le go kaela banana kwa ngwao ya bone e tswang teng. 

O buile fa go dira jalo go tlaa thusa thata gore banana ba fetisetse ngwao kwa kokomaneng e e tlang gore ngwao ya Setswana e seka ya latlhegela ruri.

A re ntswa ipaakanyo e kgatlhisa leitlho, mowa wa boithaopo mo banning ba Sekoma le boradikgwebo o kwa tlase ka jaana go tshwere mabogo a le mangwe fela ntswa morafe o le teng. 

Kgosi Tefiso o tlhalositse fa boipuso e le jwa monni mongwe le mongwe wa Sekoma ka jalo go le botlhokwa gore botlhe ba tsenye letsogo. 

O gateletse fa mabogo dinku a thebana mme e bile megopolo e e farologaneng e ka tswa go dira boipuso jwa monongwaga gore e nne jo bo tlaa gopolwang le mo dingwageng tse di tlang ka jaana ditlhaloganyo tse dintsi di tlaa bo di tshwaraganetse ipelelo ya boipuso.

O rotloeditse banana ba motse go nna le mowa wa boithaopo a kaya fa lefatshe leno le agetswe mo moweng wa boithaopo. 

O ne a tlhalosa fa go ithaopa ga banana go tlaa ba thusa le bone go itse gore lefatshe leno le tswa kae le gone go amogela ponelopele ya lone. Kgosi Tefiso o ne gape a rotloetsa banana ba motse wa gagwe ba ba kwa ditoropong go iponatsa ka letsatsi la boipuso ka jaana le bone ntswa matshelo a bone a remeletse kwa ditoropong go le botlhokwa mo mothong go itse ngwao ya gagwe. Kgosi o gateletse fa banana ba ka anya sengwe sa ngwao se ba ka se dirisang go itshetsa. Bokhutlo