08 Jun 2016

Sekole se sebotlana sa Bokspits kwa kgaolong ya Kgalagadi se ne se  ipelela dingwaga tse di masome a marataro se ntse se le teng.Go ya ka kgosi, Mme Lydia Rautenbach, sekole seo se ne sa simolodisiwa ke batho basweu ka ngwaga wa 1928.

Kgosi Rautenbach o boletse fa  e ne ya re ka ngwaga wa 1956 puso ya tsaya sekole semmuso go fitlha mo nakong ya gompieno.

O ne a leboga thata batlapele ka boithaopo, bopelotelele le bonatla jwa bone ka go supa fa thuto e le botlhokwa ka e le bone ba ba dirileng gore sekole seo se nne se  e leng sone gompieno.

Mokhanselara wa Bogogobo –Kolonkwaneng, Rre Jonh Lentshikang, o ne a bolela fa lefatshe leno le gatetse pele mo thutong ka go e tlotlomatsa le go tlhomamisa gore ke ya boleng jo bo kwa godimo thata.

Mokhanselara Lentshikang o supile fa ngwana mongwe le mongwe mo lefatsheng leno a tshwanelwa ke go akola thuto, a kaya fa gape puso e dirile maiteko a gore e simolodise sekole sa bananyana se se ba rutuntshang (pre school) pele ga ba ka ya go simolola dithuto mo dikoleng tse dipotlana.

O boletse fa bana ba sa ele sekoleng fela  go ya go oketsa dipalo  mme ba tshwanelwa ke go neelwa thuto e e ka tokafatsang bokgoni le kitso ya bone mo isagong.

Mokhanselara Lentshikang  fa a bua boemong jwa modulasetilo wa khansele ya Kgalagadi o ne a kgothatsa dikomponi tse di ikemetseng, mongwe le mongwe le setshaba ka kakaretso go ema ka dinao ka go tshwaraganela thuto ya bana ka puso e ka seke e kgone e le nosi.

A re seo gape se ka thusa mo tokofatsong ya maduo a a kgatlhisang thata mo dikoleng ka go farologana.

Mo mafokong a gagwe a kgothatso mothusa mogokgo wa pele wa sekoleng seo, Rre Olebogeng Molelekeng o ne a re o motlotlo go bo e ne ya re  ka ngwaga wa 2006 a ntsha maduo a a itumedisang thata a lokwalo lwa bosupa mo sekoleng seo.

Morutabana Rre  Molelekeng o boletse fa tshwaragano ya maoto a mararo a pitsa e leng   batsadi,barutabana  le bana  e le konokono mo thutong ya bana ka seo se ka ba kgontsha gore sekole seo se ntshe maduo a a itumedisang ngwaga le ngwaga.

Mo ipelelong letsatsi leo, baithuti ba  pele go simologa ka ngwaga wa 1964 go fitlha 2014  ba ba neng ba dirile  sentle ka go tsaya maemo a ntlha mo lokwalong  lwa bosupa  le barutabana ba pele ba ne ba lebogiwa ka go neelwa ditlankana.

Mokhanselara wa kgaolo Rre Gideon Martin wa Bokspits o ne a lebogela botlhe ba ba neng ba tshologetse moletlo o gammogo  le barulaganyi ba one.  BOKHUTLO