07 Jun 2016

Babereki ba Lephata la Banana, Metshameko le Ngwao ba kgaolo ya Bokone Botlhaba ba ne ba tshwere moletlo wa dijo tsa maitseboa kwa Masunga kgwedi eno e le malatsi mararo kwa.

Moletlo oo, o ne o diretswe babereki ba lephata leo ba Bokone Botlhaba go ba lebogela go bo ofisi ya kgaolo ya bone  e le nngwe ya dikgaolo tse go supagetseng di dira sentle mo go diragatseng ditirelo le maikemisetso a lephata.

Go tlhalositswe fa mo dikgaolong tse di masome a mabedi le bobedi tse di nang le diofisi tsa lephata la banana, metshameko le ngwao, ofisi ya kgaolo ya Bokone Botlhaba e ne ya gapa maemo a bobedi kwa kabong dietsele ya monongwaga ya go tlhopha dikgaolo tse di dirang sentle mabapi le ditirelo tsa lephata leo.

E rile a ema babereki ka lefoko kwa moletlong oo, mokwaledi wa lephata leo, Rre Kago Ramokate a lebogela kgaolo eo go dira sentle.

A re seo ke kgatelopele e tona e e tshwanelwang ke go lemogwa le go itumelelwa ke botlhe.

Rre Ramokate a re go a itumedisa go bo mo go tse di neng di lejwa, ofisi ya Bokone Botlhaba e ne e dira go swela, mo e neng e tsaya maduo a  le go feta mo dikarolong tse dingwe.

A   re le ntswa go na le dikgwetlho mo go diragatseng mananeo, fela ba ofisi ya Bokone Botlhaba ba supile fa maano mangwe a masha a a pharologanyo a ba a itirelang le gone go tokafatsa ka fa ba dirang dilo ka teng, go ba thusitse go ntsha tlhogo mo dikgaolong tse dingwe.

Gape a re o na le tshepho ya gore ba bangwe ba tlaa tsaya malebela mo go bone, ka jalo a gwetlha ba kgaolo eo go ba bulegela ba ba thusa fa go tlhokafalang teng, e le ka maikaelelo a go dira ba le setlhopha se se ntshang maduo sa lephata la banana, metshameko le ngwao.

Rre Ramokate a re e re ka jaana go abela le go lemoga bao ba ba dirang ka natla e le selo sa botlhokwa, bone e le ba lephata la banana, metshameko le ngwao ba tlaa dira seo go nna selo modiro go leka go tsholetsa le go tiisa serodumo sa go dira ka natla, ka seo se ka thusa go kgotsofatsa ba ba ba thusang.

Mo go tse dingwe, mokwaledi o tlhalositse fa nngwe ya maikaelelo a lephata la gagwe mo ditogamaano tsa go tokafatsa maduo tsa ngwaga wa 2015/2016, e le go rotloetsa tikologo e e siametseng babereki go berekelwa mo go yone.

Rre Ramokate a re boeteledipele jwa lephata bo lemoga thata fa babereki ba lephata leo ba le botlhokwa, a re ke ka moo ba lekang go supa seo ka gone go ba rulaganyetsa mediro e tshwana le oo, ka jalo a gwetlha babereki ba dikgaolo tsotlhe go nna le boineelo mo tirong go ntsha maduo a a bonalang.

O ne a bo a gakolola ba Bokone Botlhaba go loma molomo wa tlase, ba gagamatsa setoropo mo dintlheng tse dingwe, tse ba ka tswang ba butse phatlha mo go tsone, go netefatsa gore ba tsaya maemo a ntlha mo ngwageng o o tlang.

Fa a tswa la gagwe, molomaganya ditiro wa lephata la banana, metshameko le ngwao mo kgaolong ya Bokone Botlhaba, Mme Boikarabelo Diane o ne a supa fa go bereka ba bopagane, ba le seopo sengwe le gone go tsaana ka tekatekano e bile ba gakololana e le badiredi ba kgaolo, e le gone go nnileng le seabe mo go reng ba bone maemo a a itumedisang ao.

A re dingwe tse ba di itumelelang, ke go itshegela ditema mme ba bo ba netefatsa gore ba a di diragatsa, a re mo godimo ga moo, ba tlhomamisa gore ba tsaya dikgakololo tsa ba ba ba thusang, ba bontsi jwa bone e leng banana mme ba di tlhotlhe go bona tse di ka ba berekelang.

Mme Diane o ne a gwetlha babereki ka ene go tswelela ka mowa oo, ba leka go diragatsa maikemisetso a lephata, go netefatsa gore ba tsaya maemo a ntlha mo ngwageng o o tlang.

O ne a bo a lebogela kemonokeng ya maphata a mangwe ka go farologana a a mo kgaolong, a supa fa le one a na le seabe mo go kgoneng ga bone.

Bangwe ba ba neng ba tsene moletlo oo, ke mothusa kgosi ya motse wa Masunga, Kgosi Thabo Monaga le molaodi wa kgaolo ya Bokone Botlhaba, Rre Keabetswe Lesiela, ba ba galaleditseng maiteko a badiredi ba lephata leo mo kgaolong, ba ba gwetlha go tswelela ba bereka ka thata. BOKHUTLO