22 May 2016

Banni ba Letlhakeng ba kopilwe go phepafatsa motse wa bone thata, ka jaana ngwaga ono lefatshe leno le tlaa bo le ipelela dingwaga tse di masome a matlhano tsa boipuso.

Mafoko a, a boletswe ke Kgosi Itsoseng Gaoonwe wa motse oo,  fa a ne a lekodisa banni ka ipaakanyetso moletlo wa boipuso jwa dingwaga tse di masome a matlhano.

Kgosi Gaoonwe o tlhalositse fa go tlaa nna le baeng ba bantsi ba ba tswang kwa mafatsheng a sele, ka jaana go solofetswe gore botautona ba kgaolo ya SADC ba nne teng, mme tsholofelo ke gore ba le fitlhele le le phepa go tsamaisana le kagiso e e renang mo go lone.

O ba kopile gore ba oke banana  gore ba tle go ntsha megopolo ya bone gore go ka dirwa eng, se se ka dirang gore boipuso jo bo atlege.

Kgosi o kopile dikereke go ya go tshwarela ditirelo tsa bone kwa kgotleng kgolo ya Letlhakeng, kgwedi ya Lwetse e le masome a mabedi le botlhano, e le bontlha bongwe jwa kereke go ntsha seabe sa yone mo setshabeng. 

O ba kopile gape go tsena phuthego ya BOT50, e  e tlaa tshwarwang ka Mosupologo gone kwa Letlhakeng, kgwedi ya Moranang e le masome a mabedi le boraro

  Kgosi Gaoonwe o lekodisitse morafe gape, fa molelo wa kgolagano o tlaa tla mo motseng wa Letlhakeng kgwedi ya Lwetse e tlhola gane, mme a ba kopa go ipaakanyetsa go o amogela.

Monni wa Letlhakeng Rre Jacob Lebeko, o ne a ntsha matshwenyego a gore batho ba kgaolo e, ga ba supe kgatlhego mo go baakanyetseng moletlo wa boipuso jo, a supa fa boipuso jo e tla a bo e le jo botona fela thata ka e le oo faphegileng.

Monana Rre Neo Khakhunge, o ne a ntsha matshwenyego a gore bone e le banana ba supile kgatlhego ya go baakanyetsa moletlo o, mme ga ba bone thotloetso mo batsading, a supa fa a belaela gore ba batla go ba supa ka menwana fa dilo di sa tsamaya sentle.

Mokhanselara Mme Stella Segwagwa, o ne a supa fa go nnile le tiego fela thata ya go lekodisa ka moletlo wa boipuso, mme a kopa botlhe go tsena phuthego ya BOT50 gore ba tle go abelana megopolo gore ba tlaa keteka boipuso jo jang. BOKHUTLO