11 May 2016

Bojalwa jo bo dirwang ka magapu jo bo tumileng thata kwa kgaolong ya Tswapong bo tlhokisa banwi ba jone boikarabelo kwa Tumasera le Seleka.

Fa a bua mo potsolotsong, mokhanselara wa Tumasera/Seleka Rre Obitseng Gabadise, a re ba tshwenngwa ke boitshwaro jo bo makgasa jo bo dirwang ke batho ba sena go nwa setopoti.

Mokhanselara Gabadise a re dintwa tse dingwe di felelang di baka dintsho, go tlhapatsana le dikotsi tsa dikoloi ke dingwe tsa matshwenyego a ba setseng ba a itemogetse mo banwing ba setopoti fa e sale paka ya letlhafula e tsena.

O ne a supa fa banana e le bone tshoso e rweleng mo ditiragalong tse tsotlhe. A re se se ngomola pelo ka bone banana bao ke gore ke bone ba go tweng ke baeteledipele ba ka moso.

Rre Gabadise a re gape paka ya setopoti e tsisa modumo o o feteletseng wa diletso mo motseng. O ne a kaya fa gape le tsone dinako tsa thekiso ya bojalwa di sa obamelwe.

O ne gape a supa fa ba tlhaloganya gore ba ba gwebang ka bojalwa joo, ba dira jalo go itshetsa mme a re go tlola molao ga bone go tlaa ba baya ka fa mosing ka ba ka otlhaiwa go utlwala.

Rre Gabadise o rotloeditse banwi ba bojalwa joo go nwa ka kelelelo, a supa fa ope a sena bokgoni jwa go ka ba itsa go nwa ka e se selo se se motlhofo.

Mokhanselara o ne a akgola puso go bo e ba thusitse ka koloi ya sepodise mo kgaolong ya bone.

A re mo nakong ya gompieno mapodisi ba kgona go tsibogela ditiragalo ka bontsi ntle le kgwetlho ya letlhoko la koloi. BOKHUTLO