11 May 2016

E rile bosheng, boidiidi jwa batho jwa tshologela kwa kgotleng ya goora Selotlego kwa Kanye go fitlha Mme Mosetsanagape Sekalaba.

Mme Sekalaba, yo o neng a le dingwaga di le lekgolo le borataro, o tlhokafetse kgwedi ya Moranang e le masome a mabedi le borataro.

Ba masika ba re ba belaela fa a tlhokafetse ntateng ya bogodi.

O tshotswe ka ngwaga wa 1910 kwa Kanye. 

O ne a tsena mo nyalong e e boitshepo le Rre Tlammane Selotlego yo a tlhokafetseng ka 2001. 

Ba ne ba segofadiwa ka bana ba le bararo, banna ba le babedi le mosetsana a le mongwe.

Dibui di boletse fa Mma ‘K’ jaaka a ne a tlwaelesegile go bidiwa, e ne e le mongwe wa balemi-barui ba popota gape e le leloko la mokgatlho wa sefapaano se sehibidu kwa masimong a Mmalore. 

Ba boletse fa e ne e le senatla sa go roka ka diatla. 

Ba re e ne e le setswerere sa go apaya e bile a rata bophepa. 

O ne a le lerato mo bathong botlhe.

O tlogela bo monnawe ba bomme ba le babedi. Bana ba basimane ba le babedi, ditlogolwana di le masome a mabedi le borataro, dikokomane di le masome a mane le  dikokomane tsa dikokomane di le supa. ENDS