11 Apr 2016

Badiri ba  seromamowa sa Botswana le banni ba Mmathubudukwane le Mochudi kwa kgaolong ya Kgatleng ba ne ba ipelela dingwaga di le masome a matlhano seromamowa seo se ntse se le teng.

Fa a bua kwa metseng eo, mogolwane go tswa kwa seromamoweng, Rre Bofelo Rakgasa o ne a tlhalosa fa ba bone go tshwanela gore ba tsamaye le lefatshe ka bophara go isa seromomaowa kwa setshabeng.

A re ba bone gore le bone ba ipele jaaka lefatshe leno le tla a bo le ipelela dingwaga di le masome matlhano le ipusa a tlatsa ka gore ba simolotse kwa Lobatse kwa seromamowa se simolotseng teng. A re mosepele wa go isa seromamowa kwa Batswaneng o tla wela kgwedi ya Lwetse ngwaga ono.

Rre Rakgasa o tlhalositse fa seromamowa e le sa setshaba ebile go le botlhokwa thata gore Batswana ba itse badiri ba sone go na le gore ba ba utlwe mo seromamoweng fela.

Mogolwane wa seromamowa o ne  gape a rotloetsa bana ba dikole ba ba neng ba tsile ka dipalo tse di kwa godimo go dira ka natla mo dithutong tsa bone a tlatsa ka gore botshelo jwa malatsing ano gore motho a bo kgone ke go bo a tsene sekole.

E ne ya re a tswa la gagwe, kgosi ya Mmathubudukwane, Kgosi Michael Balebetse o ne a supa fa ba le motlotlo thata go bo seromamowa se ne se gasa ka tlhamalalo go tswa kwa motseng wa bone.

O ne a leboga badiri ba sone thata a supa fa ba ne ba sa ba itse mme ba itse mantswe a bone. Kwa Mochudi, Kgosi Modise Pilane o ne a tlhalosa fa a itumelela gore badiri ba seromamowa seo nako tsotlhe fa ba le mo tirong ya bone ba letsa dipina tsa bana ba Botswana mme o ne a ba rotloetsa go tshwara fela jalo.

A re go dira jalo ba supa gore mmino wa mo gae o seka wa latlhega a tlatsa ka gore le bone badiragatsi ba one ba tla nna le tshepo mo go sone seromamowa. E ntse e le kwa letsatsing leo, modulasetilo wa ba-na-le-bogole Rre Shadrick Ndlovu yo le ene a neng a itumeletse loeto la badiri ba seromamowa, o ne a tlhalosa fa ba na le komiti ya bao baba tshelenag ka bogole mo Mochudi.

A re maikaelelo a komiti eo ke go rotloetsa botlhe ba ba tshelang ka bogole gore ba seka ba itlhoboga mme ba batle maele a go itshetsa mo matshelong a bone. Kgosi Segale Linchwe ene o ne a bua ka ditso tsa Bakgatla a supa fa Bakgatla e le batho ba ba ratang ngwao ya bone mme ebile ba e tlotla fela thata.

Badiri ba seromamowa ba ne wetsa loeto la bone mo kgaolong ya Kgatleng ka go itisa le Bakgatla bosigo jotlhe ka matlhatso kwa lebaleng la Rovers. BOKHUTLO