31 Mar 2016

Mopalamente wa kgaolo ya Shoshong Rre  Dikgang Makgalemele o rotloeditse banni ba motse oo go tshwaragana are se, se ka thusa go hehosa ditlhabololo mo motseng wa bone.

Mopalamente o buile se kwa kgotleng kgolo ya goora Kgamane ka Matlhatso kwa temong ya ditlhare e e neng e rulagantswe ke banana ba mokgatlho wa Makgobokane Social Club mo Shoshong.

Rre Makgalemele o ne a akgola banana go tsaya karolo mo tirong ya temo ya ditlhare are go le gantsi ba tlwaelesegile ka go goga dinao mo mererong ya tsa ditlhabololo tsa motse.

O ne a akgolela banana ba mokgatlho o tiro e ba e dirang a tlhalosa fa go jwala ditlhare e le maiteko a a matona, ka di tisa meriti ebile di dirisiwa ele metswedi e e tlhabololang metse.

A re go bo ba jwala ditlhare ka letsatsi le go amogelwang Jeso Keresete ka lone go supa mowa wa neelo le boutwelobotlhoko.

Mongwe wa dikgosana tse di neng di amogela setlhare, Kgosi Ogaketse Batsietswe wa kgotla ya Thagana are o itumeletse maiteko a mokgatlho,a kaya fa setlhare se ba se biditse Makgobokane.

Modulasetilo wa mokgatlho wa Makgobokane Rre Edwin Lesole o tlhalositse fa maikaelelo a mokgatho ele go thusa ba ba sa kgoneng le go tlhabolola motse ele banana.

A re ba tlhophile go lema ditlhare mo dikgotlaneng, a kaya fa setlhare se ka tisa botshelo gammogo le go nna sekao sa ngwao.

O ne a kgothatsa banana ba bangwe go inaakanya nabo, a feleletsa ka go supa fa ele bone banana ba ka tlhabololang motse wa bone eseng ope gape. BOKHUTLO