14 Mar 2016

Makhanselara a khansele ya Kgalagadi a boletse fa ka ngwaga wa 2036, ba eletsa gore Motswana mongwe le mongwe a bo a tsaya karolo mo ditogamaanong tsa mananeo a a farologaneng a puso.

E rile  ba ntsha maikutlo a bone fa pele ga  lekoko le le romilweng ke Tautona go tsaya megepolo ya tebelelopele ya 2036 kwa phuthegong ya  khansele bosheng, makhanselara a supa  fa  lefatshe leno le itsege ka puso ya batho ka batho ka jalo seriti seo se tshwanetswe go atolosiwa le  Motswana mongwe le mongwe, go sa kgathalesege gore ke wa letso kana tumelo efe, e le sone  sebaka sa go direla lefatshe la bone.

Mokhanselara wa Kang Bokone, Rre Kemmonye Makatane, a re Batswana ba tshwanetse go akarediwa ka go bonala fa taolo ya itsholelo mo nakong eno  e tsamaela go nna mo  diatleng tsa batswakwa.

Ka jalo, Rre Makatane a re seemo seo se  tshwanetse go potlakelwa ka go fa Batswana taolo  ya go laola itsholelo ya bone.

Mokhanselara Henry Louw wa Werda  o ne a iteela kobo moroko mafoko a ga Rre Makatane tebang le go  akaretsa Motswana mongwe le mongwe mo go tlhabololeng lefatshe.

Rre Louw o ne a tswelela ka go kaya fa dikgaolo tsa Botswana di aperwe ke dikgwetlho tse di farologaneng ka jalo o bona go tlhokafala gore puso e fe dikhansele dithata le ditlamelo tse di lekaneng go itsamaisetsa dikgaolo ka ngwaga wa 2036. A re mo mafatsheng a a mabapi jaaka Aferika Borwa, di kgansele di filwe dithata go itsamaisetsa merero ya tsone ka jalo seo se fokoletse  puso mokgweleo.

Rre Louw o ne a tswelela ka go  tlhalosa fa  seemo sa thuto mo lefatsheng leno se sa kgotsofatse ka jaana  boleng jwa thuto bo wela tlase ka gore bana ga ba rutiwe methale e e maleba ya go itsheditsa ba sa ntse ba tsena sekole. 

Rre Louw a re o dumela gore go ruta dithuto tsa diatla e le yone tsela fela e e tlaa lwantshang seemo se se golelang pele sa letlhoko la ditiro mo bananeng.

Le fa go ntse jalo, Rre Nkatlholang Simane, yo e leng mokhanselara yo o itlhophetsweng, o boletse fa ene a  eletsa go bona ditlamelo le meamuso ya puso e abelwa dikgaolo ka tekatekanyo gore Motswana mongwe le mongwe a tshele ka boitumelo mo dingwageng tse di masome a mabedi tse di tlang. 

O ne  a tswelela ka go supa  fa gape a bona go le maleba gore ngwao ya Setswana e tsosolosiwe le jone botho le boitsholo  jo Batswana ba itseweng ka jone. BOKHUTLO