07 Mar 2016

E ne ya re ka Labotlhano khansele potlana ya Bobirwa ya tshwara phuthego ya go ntsha pego ya kakanyetso ya kgaoganyo madi a ditiro tsa khansele ya ngwaga 2016/2017.

Modulasetilo wa komiti ya madi le ditlhabololo tsa khansele e, Rre Victor Jimmy Mphee, yo e bileng e le mokhanselara wa Motlhabaneng/Lentswelemoriti, o tlhalositse fa khansele e tlaa tlhoka P79 520 980 go dira ditiro tsa khansele mo ngwageng wa madi wa 2016/2017 fa mo ngwageng  o o fetileng wa madi khansele e ne ya tlhoka P78 718 650 go dira ditiro tsa khansele.

A re lephata la boipelego le tlaa tlhoka P17 504 050, la thuto P7 368 600, la madi P6 038 830, la dikago P6 234 020, la molao P4 927 180, la tsamaiso ya khansele P5 851 990, la matlo le tlhokomelo ya one P1003 810. Lephata la la babereki le tlaa tlhoka P13 652 770, la boranyane jwa dikago P12 167 740 fa la botsogo jwa setshaba le tlaa tlhoka P4 771 990.

Fa ba akgela, makhanselara a kopile gore kakanyetso ya kgaoganyo ya madi a khansele e ne e tla ka nako gore ba kgone go akgela le go baakanya tse di tlhokegang gore di ka baakanngwa mo go yone. Bokhutlo