06 Mar 2016

Banni ba dikgotla tsa Tidimalo, Dilaene, Madiba le Madiba14 tse di bidiwang Tidima  ka bokhutshwane mo Mahalapye, ba kokoanya madi go dira ditlhabololo mo dikgotlaneng tsa bone.

Fa a bua mo kgaisanong ya dijo e e neng e tshwaretswe ko kgotleng ya Tidimalo, modulasetilo wa komiti ya ditlhabololo ya dikgaolwana tse, Rre Gareutwane Semente a re ba bone go tshwanela gore ba tle ka maano a a ka tsisang madi mo letloleng la bone.

Rre Semente a re se ke tshimologo ya ditiro tse ba tlaa di dirang tse di tlaa tsenayang madi mo komiting. 

A re keletso ya bone e le beng ba dikgotla tse ke go itirela madi a a ka ba thusang mo dinakong di tshwana le tsa gompieno tse puso  e senang madi a a lekaneng go dira ditlhabololo.

A re ba tlaa leka ka bojotlhe go dirisanya le merafe ya bone go kgobokanya madi ka ba ka se kgone go dira tiro e ba le nosi.

A re kgaisano e ya dijo e ne e le go kgobokanya madi mme gape e le go kopanya merafe ya bone gore e itsane.

O ne a re dikgaisano tse ba di dirang ga ba tsee  madi fela mme ba busetsa batho ka go atswa ba ba fentseng.

A re ba batla gore ba kgobokanye madi a a ka lekanang go aga ntlo ya dikamore tse pedi, e ba e hirisang gore ba tsenye madi mo letloleng.

 A re gape sekole se sebotlana sa Fredrick se kopile kgotla nngwe le nngwe go ba thusa ka madi a a ka tshwarang sekete, go ipaakanyetsa moletlo wa dingwaga tse di masome a mane ka jalo le bone ba batla go kgona go a ntsha. Bokhutlo