28 Feb 2016

Leloko la lekoko le le romilweng ke Tautona, Dr Alfred Tsheboeng, a re tebelopele ke yone motheo wa ditogamaano tsa lefatshe. 

O buile jalo kwa phuthegong e e neng e buisiwa ke lekoko le romilweng ke Tautona go rerisa Batswana le go tsaya megopolo mabapi le tebelopele ya 2036 kwa Mosu ka Labobedi.

Dr Tsheboeng a re puso e leka bosigo le motshegare go fokotsa lehuma la nta ya tlhogo, go bopaganya batho le go fokotsa borukutlhi.

Mongwe batsena phuthego, Rre George Batsoseng, a re o eletsa gore ka ngwaga wa 2036 , Batswana ba bo  ba tlhabologile botlhe, ditlamelo tsa botsogo di le gaufi e bile ditlhabololo di akaretsa  Batswana ka go lekana.

Mme Goyamang Abofilwe ene o eletsa  gore motswana  mongwe le mongwe a  bo a na le setho se se amogelesegang, ngwao e tsosolosiwe, Batswana ba ithute diteme ka go farologana, ba ithute ditiro tsa diatla, itsholelo e dirisiwe sentle, puso e bo e tswelele e rerisa batho. 

Rre Gosekwang Tsapo a re o batla gore ka 2036 kgokgontsho ya bana le bomme e bo e seo, bojalwa le jone bo emisitswe, batho ba tsena dikereke go anya dikitso le gore sepolotiki e bo e le se se agang ditlhabololo tsa motse,

Kgosi Phillip Kopano a re ene o batla gore ngwao  e bonale e simololwe ke bogosi , a re ntlo ya dikgosi e bo  e dirisa puo ya Setswana ka 2036, go bo go atolosiwe maranyane a ditlhaeletsanyo.

E rile a soboka megopolo, mongwe wa lekoko leo Kgosi Maruje Masunga a re ba  batla gore ditsela di bo di siame, motse o na le moalo bojanala bo tlhabolotswe, boranyane bo rutiwa kwa dikoleng tse di potlana, setshaba se tlhabologile se na le bonno, go na le ditiro, dikgosi di filwe dithata e bile ba eteletse pele ngwao. BOKHUTLO