28 Feb 2016

Ramapodisi a Bobonong, Superintendent Paul Seoko, a re e sale ngwaga ono o simologa, dipalo tsa dintsho tse di amanngwang le tlhoka kutlwisisano ya bakapelo di golela pele kwa Bobonong.

Rre Seoko a re ba setse ba begetswe dintsho di le tharo tse di amanngwang le tlhoka kutlwisisano ya baratani mo dikgweding tse pedi tsa ntlha tsa ngwaga.

A re mo tiragalong e nngwe, monna mongwe o ne a bolaya mokapelo wa gagwe mme morago a ikgapela botshelo, fa mo go e nngwe, monna mongwe a ne a ikgapela botshelo morago ga go tlhoka kutlwisisano le mokapelo wa gagwe.

Ramapodisi o boletse fa ba tlhotlhomisa tiragalo e go fitlhetsweng monna wa dingwaga tse di fa gare a rapaletse mo boidiiding jwa madi a tlhokafetse e bile a na le ntho mo letsogong bosheng.

Rre Seoko o tlhalositse fa monna yo, a fitlhetswe kwa lelwapeng la mokapelo wa gagwe e bile digalase tsa ntlo e e robalang mokapelo yo di thubegile.

O kgothaditse setshaba go kopa bogakolodi fa ba na le mathata go itsa dikgang tsa mothale o.

Le fa go ntse jalo ramapodisi o boletse fa ofisi ya sepodisi ya Bobonong e kgonne go fokotsa dipalo tsa borukhutlhi mo motseng kwa ntle ga go thujwa ga mabentlele mo go bakiwang ke go sa thapeng badisa dikago. BOKHUTLO