02 Feb 2016

Assistant Superintendent Batshwari  Gaobatlelwe wa Good Hope o gakolotse bakgweetsi  mo tseleng ya Good Hope  - Pitsane e e  santseng  e atolosiwa, go  kgweetsa ka kelotlhoko.

Assistant Superintendent Gaobatlelwe   o buile  jalo  mo potsolotsong  bosheng.

A re ba gatisitse  dikotsi tsa dikoloi di le nne mo tseleng eo tse a reng go belaesega dikoloi  di reletse.

O tsweletse ka go bolela gore ba emetse lephata la ditsela go tla go rurifatsa gore bothata ke eng mo tseleng eo.

 A re dikotsi tsa dikoloi tse nne tse, di gatisitwe mo malatsing a a farologaneng.  

A re le fa go ntse jalo  bapalami ba dikoloi tseo  botlhe, ba  alafetswe dikgobalo ba bo ba ntshiwa kwa sepatela sa Good Hope, fa a le mongwe fela  wa  bone  a santse a robaditswe kwa kokelong  ya  Marina.

Mo potsolosong e nngwe, mogolwane wa mapodisi a tsela kwa  Ramatlabama, Insector Oathusa Tshotlego a  re ba gatisitse kotsi e nngwe e potlana mo tseleng ya Bethele – Ramatlabama.

 A re mokgweetsi o ne a tsere koloi a sa letlelelwa ke mong wa yone, gape a sena setlankana sa go kgweetsa, a tlatsa ka gore ga se e e ka amanngwang le go dirwa ga tsela.

Inspector Tshotlego o tsweletse a supa gore bakgweetsi  ga ba obamele matshwao a tsela.

A  re le fa gontse go na le dikotsi, se se lebosegang ke gore dikotsi tse,  ga di gape matshelo a setshaba a tlatsa ka gore  o itumelela fa mo dikotsing tse, go fitlhetswe bapalami ba ne ba dirisitse lebante la itshireletso. Bokhutlo