27 Jan 2016

Lekgotla la dingwetsi le sa tswa go simolodisiwa kwa Palapye morago ga go tlhamiwa kwa Tamasane ka 2011. Maikaelelo a lekgotla ke go tla ka ditharabololo tsa go fedisa ditlhalano le dipolaano tsa baratani.

Lekgotla le ikaelela go buisana le banyalani le bomme ba malwapa ka se lenyalo e leng sone le gore ba ka hema jang dikgwetlho tsa malwapa fa di nna teng go fokotsa ditlhalano.

Modulasetilo wa  kgaolo, Mme Grace Silver, o ne a tlhalosa fa rre e le tlhogo ya lelwapa, fa mme ene e le mothusi wa ga rre.

A re mosadi ke ene moagi wa lelwapa, mme o ka kgona seo ka go tlotla tlhogo ebong rre mme rre le ene a tlotla mothusi wa gagwe ebong mosadi.
Mme Silver o ne a kopa bomme ba ba nyetsweng go rwadisana merwalo ka dikgang tsa malwapa segolo jang fa mme a tla a supa fa go se monate mo nyalong ya gagwe.

O ne a gatelela botlhokwa jwa go ikaga le go itse Modimo, mme a gakolola bomme go emisa go tsamaisa malwapa a bone ka maranyane a facebook le whatsaap.

A re dilo tse ke tsone di gakatsang ditlhalano segolo jang basha, o ne a bo a kgala batsadi a re “ e anya e leletse e ruta e maleng”.

A re kgang ya bone ke go bopa malwapa, go tlisa boitumelo mo malwapeng, go ruta borre ka go aga malwapa le bomme ba bone le go rotloetsa bomme go dirisa mananeo a puso go itlhabolola le go thusa balekane ba bone ebong borre go tokafatsa matshelo mo malwapeng. Bokhutlo