12 Jan 2016

Balemi ba Shakwe  ba ba phakileng dipeo tsa mabele a nomoro ya 1008 ba kopilwe go di busa ka thobo ya tsone e sa siamela go jewa.

Kopo e, e dirilwe ke molemisi wa koo, Rre Sylvester Tsheole, mo phuthegong ya kgotla e e neng e buisiwa  ke mothusa tona wa dikgaolo le tlhabololo magae, Mme Botlogile Tshireletso ka Labotlhano.

Rre Tsheole o tlhalositse fa dipeo tseo e le tsa mabele a a dirang bojalwa  e bile di sa siamela go jewa.

Mogolwane wa ofisi  ya balemisi  mo kgaolong potlana ya Mahalapye, Mme Pelontle Seabe, le ene o ne a tlhalosa gore ba lemogile gore go na le bangwe ba ba phakileng dipeo tsa mabele a  a dirang bojalwa.

Mme Seabe  o  tlhalositse fa mabele ao a ka dira dijo tsa leruo fa a kgaolwa pele ga a butswa.

O tlhalositse fa ISPAAD e duelela ditshenyegelo tsotlhe tsa temo  fa molemi a lemile dijo tse di jewang ke batho.

A re fa molemi a lemile tsa leruo, puso e duela sephatlo sa ditshenyegelo fela.

Mme Seabe o ne a tlhalosa fa a ka seka a kgona go bua le babegadikgang kwa bothokong go tlhalosa kgang e ka botlalo. 

Le fa go ntse jalo, Rre Tsheole o ne a tlhalosa mo potsolotsong gore go  lebega fa  dipeo tseo di tswa mo  khamphaning  nngwe e e ikwadiseditseng go aba dipeo.

A re bone ba neela balemi dipampiri tse di ba letlelelang  go tsaya dipeo mo dikhamphaning tse di ikwadisiseng le puso go aba dipeo.

Mongwe wa banni ba Shakwe, Mme Gabanapoloko Kennekae o tlhalositse fa a phakile peo eo  e bile a setse a  lemile. Ends