04 Jan 2016

Mopalamente wa Shoshong, Rre Dikgang Makgalemele, a re e re le ntswa lenaneo la ESP le diretswe go rudisa le go tswakanya itsholelo, go tokafatsa matshelo a Batswana le go direla Batswana ditiro tse ba ka itshetsang ka tsone, go supega fa makhanselara a khansele ya kgaolo ya Legare ba sa itumedisiwa ke lenaneo leo ba re le beile dikgaolwana tsa bone ka fa mosing.

O buile seo mo diphuthegong tsa kgotla tse a neng a di buisa kwa Kalamare le Dibete tse mo go tsone a neng a lekodisa banana ba kgaolo ya gagwe ba ba berekelang kwa ntle ga metse ya bone, gore le fa makhanselara a ngongorega gore ga ba a lekodisiwa ka bophara ka maikaelelo a lenaneo leo, le ditiro tse di tlaa dirwang mo dikgaolwaneng tsa bone, gone Batswana ba tshwanetse go ipaakanyetsa go ikopela ditiro tse di tlaa dirwang mo metseng ya bone ka lenaneo leo mo ngwageng wa madi wa 2016/17.

Rre Makgalemele yo e bileng e le mothusa tona wa merero ya ofisi ya ga Tautona le bodirelapuso o tlhalositse gore maikaeleo a lenaneo la ESP ke go batla metlhala ya go tshwakanya itsholelo, go tokafatsa matshelo a Batswana, go tsosolosa temo-thuo, dikoporase le go lwantsha letlhoko la ditiro ka go ithola ditiro dingwe tse di ntseng di dirwa ke mmuso.

O tsweletse ka go tlhalosetsa batho ba ba neng ba tsene diphuthego tseo gore e le baeteledipele ba lefatshe leno ba tsweletse ka go sekaseka lenaneo la ditogamaano tsa ditlhabololo tsa setshaba tsa bolesome le motso (NDP11) le lenaneo la ditogamaano tsa dikhansele la DDP 8.

Rre Makgalemele a re ditiro dingwe tse di tla dirwang ka lenaneo la ESP di akaretsa go tokafatsa bonno jwa badirelapuso, kago ya dikokelo le dikokelwana, tlhabololo ya ditsela, kago ya matlwana a borutelo mo dikoleng tse dikgolwane le tse dipotlana, go tokafatsa phatlalatso ya metsi le motlakase ga mmogo le go lwantsha letlhoko la ditiro le le gateletseng  banana.

Tona o ne a kopa banana ba metse eo segolo jang ba  ba nang le dikitso tse go thusa dikomiti tsa ditlhabololo mo metseng ya bone ka dikgakololo tse di dirang gore metse ya bone e gatele pele mo ditlhabololong di tshwana go inaakanya le dikgwebo tsa bojanala,le dikoparase tse a tlhalositseng fa di le bogadi bo gaufi.

E rile banana ba metse ya Dibete le Kalamare ba tswa la bone, ba supa ngongorego ka tiego ya go abela banana lefatshe ga makgotlana a kabo-ditsha, ditlhwatlhwa tse di kwa godimo tsa kgokelo ya motlakase, tiego ya go rurifadiwa ga dikopo ke bagolwane ba maphata a a lebaneng le go thusa setshaba ka mananeo a tshwana CEDA, ISPAAD, LIMID, le la banana la Youth Development Fund.

Ba boleletse mopalamente gore ditiego tsa go nna jalo ke tsone tse di kgoreletsang le go kgobisa banana marapo go tsena ka mmetela mo dikgwebong le go dirisa mananeo a puso.
Kwa Kalamare, ba kopile gore tsela e kgologolo e e tshwaraganyang motse  wa bone le Mahalapye e gopiwe kgapetsakgapetsa ka e le yone e ba beileng matshelo mo go yone go ya merakeng le masimo ka kwa ga Dibete.

Ba ne gape ba kopa mmuso go ba ngathela lefatshe mo polasing e e kwa Dibete gore ba kgone go simolola kgwebo ya go rua dipodi le bommantshe. BOKHUTLO