04 Jan 2016

Bakgatla bangwe ba supile fa ba batla phimolo dikeledi mo khanseleng ya kgaolo ya Kgatleng morago ga go dirwa ga ditsela dingwe mo motseng wa bone.

Fa a rola matshwenyego a bone, moeteledipele wa lekoko le le batlang phimolo dikeledi, Rre Morgan Kgetsi o boletse fa morago ga go dirwa ga ditsela tse di ralalang motse wa bone matlo mangwe a ne a senyega.

Rre Kgetsi o boletse fa ba sa bolo go ikuela ka kgang eo a tlatsa ka gore le ene rakonteraka yo o neng a filwe tiro eo ga a tsibogele boikuelo jwa bone.

O boletse fa ba bone go le maleba gore ba ikuele mo khanseleng go na le rakonteraka a tlatsa ka gore khansele ke yone  e e ka bonang gore e bua le rakonteraka ka ke bone ba ba neng ba mo file tiro eo.

O tlhalositse fa go utlwisa botlhoko gore bagolwane ba khansele ba nna ba ba tshephisa gore ba tlaa ba thusa mme nako kgolo ke eno a supa gape gore bontsi jwa batho ba ba senyegetsweng ba kobo dikhutshwane mme seo se supa fa ba beilwe ka fa mosing.

A re bone se ba se lopang mo khanseleng ya Kgatleng ke phimolo dikeledi fela gore ba kgone go baakanya matlo a bone a a senyegileng.

O ne a re ba a tlhaloganya gore tsela ke ditlhabololo mme fela o ne a kopa bogogi jwa khansele go tsibogela selelo sa bone. E ne ya re a mo kgwa dikgaba, modulasetilo wa khansele ya Kgatleng, Rre Mpho Morolong  a supa fa a itse seemo seo thata a tlatsa ka gore kgang eo e tswa kgakala e buiwa.

O ne a ba tlhomamisetsa gore ba tlaa bona gore ba ba thusa jang a supa fa khansele e sa nna fela e tsweletse ka go tswa ka ditsela tse ba ka thusiwang ka tsone.

A re ditsamaiso di teng tse di tshwanetseng go salwa morago a tlhalosa fa phoso e dirwa ke mongwe le mongwe e bile e baakangwa ke motho gape.

Fa a tswa la gagwe mokwaledi wa khansele, Rre Nelson Mogapi le ene o ne a supa fa e se maikaelelo a khansele a go tlhoka go tsibogela kgang eo a supa fa gone ba itse gore ke kgang ya bogololo mme ba tlaa leka ka bojotlhe go ba thusa.

Rre Mogapi o ne a ba kopa go nna pelotelele mme a ba tshephisa fa ba tlaa thusiwa go sena bothata bope.BOKHUTLO