08 Dec 2015

Kgosi Pius Letsholo  wa Woodhall kwa Lobatse  a   re bokopano jwa dikereke bo botlhokwa  ka jaana  dikereke di tshwaraganya morafe.

Kgosi Letsholo   o buile  jalo fa komiti ya bong  ya Lobatse  e ne e tshwere thuto-seka dipuisano le  baruti le baemedi ba dikereke, go ba tsibosa ka dikgang tsa bong le go ba  lemotsha  botlhokwa jwa go nna le seabe mo go tsone.

 Baruti le baemedi go tswa mo dikerekeng tse di farologaneng, mo toropong ya  Lobatse ba tsibositswe ka dikgang  tsa bong le kgokgontsho ya bana ba basetsana le bomme.

 Mogolwane   go tswa  kwa  lephateng la  bong, Mme Gomolemo Rasesigo,  a  re  dikgang tsa bong le kgokgontsho ya bomme le bana ba basetsana  ke matshwenyego a magolo.

 Mme Rasesigo   a re  malatsi  a a lesome  le borataro a direletswe go ema kgatlhanong le kgokgontsho ya bomme le bana ba basetsana le dikgang  tsa bong, le go tsibosa dikereke gore di tseye karolo  le go ruta  diphuthego ka dikgang tsa bong.

 A re ba lemoga gore kgethololo ya bong le kgokgontsho ya bana  ba basetsana  di rotloediwa  ke go tlhoka go buisana kgotsa go tlhoka go rerisana a    re ba dikereke ba tseye boikarabelo jwa go rutuntsha  diphuthego, mo malatsing a, le go feta e nna bontlha jwa thuto kwa kerekeng. 

O tsweletse a supa gore go na le dilo di le mmalwa tse  di rotloetsang kgokgontsho le dikgang tsa bong jaaka go latlhegelwa ke dithoto, go wela kwa tlase ga itsholelo mo go amang le yone itsholelo ya lefatshe, a re e baka le dikgobalo, le kwelo tlase ya maduo mo tirong.

 Mme  Rasesigo,   a re dingwao le ditumelo tse di farologaneng le tsone di na le seabe thata mo dikgannyeng tse, a bolela gore kgokgontsho e  e amile thata matshelo a bomme ka dipalo tsa masome  a marataro le bosupa mo lekgolong, fa borre bone dipalo tsa bone e le masome  a mane le bone mo lekgolong  ba  amilwe  ke  kgokgontsho e a reng dikereke di  tseye karolo gore e e di tshwanetseng  ba dire tiro ya Modimo ya sekeresete.  

Mokwaledi  wa  komiti ya tsa bong kwa Lobatse, Mme Kutlo Mophalane, o supile gore komiti e dirilwe ka maphata a  puso a a farologaneng, jaaka ba khansele, ba ofisi ya ga molaodi, mapodisi, badisamagolegwa, ba sesole sa Botswana, kokelo ya Atholone, Botswana Post le tse dingwe fela go akaretsa maphata, a a  ikemetseng a eseng a puso.

 O tsweletse a kgothatsa baruti le baemedi, ba dikereke go nna le mananeo  ao ka one go tlaa  dirwang thulaganyo  ya gore bomme ba rotloediwe mo go tsa bong le tekatekano go ya  ka  ditirelo le dithulaganyo tsa mananeo jaaka, go aba, dikomiti tsa mo kerekeng, le gone go neelwa maemo.

 A re fa go kgaoganngwa  madi  go bona gore go  abelwa  mang  le gone go sekasekiwe go akarediwe bomme le borre.

 Mme   Mophalane   o ne a kgothatsa maloko a dikereke go   phuthologa    go ntsha  dikakanyo,   go bua le go  tsaya karolo mo kerekeng le gone go fa bomme sebaka sa gore ba tshware maemo a a kwa godimo mo kerekeng.

 A re bomme le borre ba tshwanetse go tshwara maemo a a tshwanang a tiro, a re botlhe ba na le bokgoni, a re gape botlhe ba tseye ditshwetso tse di lekanang.

 Mme Snowball Office ene  e le yo o lebeletseng dikgang tsa bong mo khanseleng ya toropo ya Lobatse a re maikaelelo ke go dira kitso  ka go tsibosa setshaba sa Lobatse ka dikagng tsa bong le kgokgontsho ya mo malwapeng.

 Go itsise ka komiti e ya  kgaolo ya Lobatse ya dikgang tsa bong le gone go bona seabe sa dikereke go fedisa kgokgontsho kgatlhanong le bomme le bana ba basetsana mo malatsing a a lesome le borataro a go ema kgatlhanong le kgokgontsho ya bong.

 Moruti  Daniel  Otlaadisa wa kereke  ya  Humble Before Christ International a re go tlhoka gore bobedi mo lenyalong ba ithutane gore mongwe le mongwe a itse bokowa jwa molekane wa gagwe, a re fa ba sa ithutane ba felela ba le mo ditlhalanong tse di apereng lefatshe. Bokhutlo