08 Dec 2014

E rile bosheng khwaere ya St Conrad’s kwa Ramotswa ya bo e ipelela phenyo ya dikopi tse tlhano tse ba di fentseng kwa dikgaisanong tsa moopelo wa dikereke tsa Roma kwa Aferika Borwa.

Mogolwane wa khwaere eo, Rre Lekgotla Dingalo, o supile fa ba simolotse ka go gapa sekgele mo dikgaisanong tsa mono mme ba nna bangwe ba ba emetseng dikhwaere tsa Roma kwa dikgaisanong tsa Aferika Borwa.

O tlhalositse gore mo dipineng tse thataro tse ba neng ba di gaisanela, ba fentse di le tlhano, ba tsaya maemo a ntlha mo dipineng tse pedi, a bobedi mo go e le nngwe le a boraro mo dipineng tse pedi. 

Rre Dingalo o tlhalositse fa khwaere ya banana e gapile maemo a ntlha mo pineng ya Mbuti ya Shizwele, e tlhamilwe ke DC Marivate, fa khwaere e tona yone e a gapile mo pineng ya Ngiyakholwa e tlhamilwe ke Qinisela Sibisi.

Le fa go ntse jalo, o lebogile ba lebenkele la Spar go ba thusa ka P30-000 go ya dikgaisanong tseo mme a re ba na le kgwetlho ya go aga khwaere ka jaana e ntse e opelelwa ke bagolo mme jaanong ba latlhetse jalo ba beile mo bananeng go tshegetsa serodumo sa yone. 

Rre Dingalo o boletse fa kgwetlho e tona e le go tlhoka go kopana sentle ga banana ka ntlha ya ditshwarego tsa sekolo le letlhoko la madi.

Ntle le tseo, Rre Dingalo o boletse fa ba leka ka bojotlhe go tlisa maduo a mantle, a supa fa a kgona go bitsa moopedisi e bile e le motlhami Rre Kgotlaetsile Pule go tswa kwa Aferika Borwa go tla go rutuntsha khwaere ya bone. 

O supile fa a rutuntsha le bangwe ka ene go opedisa khwaere jaaka Rre Mpho Radikara, yo a supileng fa a kgona go e opedisa fa a seyo.

Rre Dingalo o boletse fa a opedisa le khwaere ya Andante, e le yone a supileng fa e dira bontle fela thata.

Moanamisa mafoko wa khwaere ya St Conrad’s, Rre Thapelo Kelaotswe o supile fa ba kgonne go gapa dikgele tse ka ntlha ya boitshoko, lorato le kagiso tse ba nang le tsone gammogo le thotloetso le dithapelo tsa bakaulengwe ba bone. BOKHUTLO