04 Dec 2014

Botsogo le mmele o o itekanetseng ga badiri go ka ba nonotsha go ntsha maduo a a solofetsweng mo ditirong tsa bone ka go farologana.

E rile a bua kwa moletlong wa itekodiso malwetse le itshidilo mebele o tshwerwe ke ba lephata la makgotla a Setswana kwa Maun bosheng, moeteledipele wa sepatela se se ikemetseng ka nosi sa Leshalaba Lifestyle Centre, Mme Ikwatlhaeng Wellio a bolela fa a leboga puso go bo e tsweletse ka go tsaya tsia botsogo jwa badirela puso.

A re botsogo ke konokono ya botshelo jwa motho jalo motho o tshwanelwa ke go nna a tsogile sentle mo tlhaloganyong, mmele le mowa  ka tse tsotlhe di dira gore motho a kgone go dirisana sentle le bangwe ka ene le tikologo e a leng mo go yone.

O tsweletse ka gore badiri ba ba itekanetseng ba ka ntsha maduo a a molemo le go direla lefatshe ka natla mo ditirong tsa bone. Mme Wellio  a re setshaba ka kakaretso se tshwanetse go nna se tsaya dikgakololo mo maphateng a botsogo le go tsaya ditaelo tsa kalafi ka tlhoafalo le keletlhoko go netefatsa gore mebele ya bone e nna e itekanetse ka nako tsotlhe.

A re e le ba Leshalaba, ba eteleditse botsogo jwa setshaba sa Botswana kwa pele le go fitlhelela maitlamo a lefatshe leno a go nna tshaba e e itekanetseng ka 2016. BOKHUTLO