04 Dec 2014

Mokwaledi mogolo wa kereke ya Apostolic Faith Mission in Botswana, Moruti David Seithamo o akgotse lekgotla la banana ba kereke eo go bo ba setse morago motlhala wa sekeresete wa go thusa ba ba tlhokileng lesego.

E rile fa banana bao ba abela lelwapa la ga Ra Sebotso ntlo bosheng, Moruti Seithamo a tlhalosa gore kereke e tshwanelwa ke go tsenya letsogo mo tirong e ya komiti ya banana go ba rotloetsa  ka maikaelelo magolo ele gore kereke e nne  le ditso tse e tla tswelelang  ka tsone mo thulaganyong ya go rorisa Modimo.

A re lekgotla la banana ba kereke le lemogile letlhoko la lelwapa loora Sebotso mme la bona go le botlhokwa gore le ba thuse, a re se ke bontlha bongwe jwa go supa ditiro tsa sekeresete ka gonne phuthego ya kereke e ne e se sa bone boroko ka letlhoko le.

Moruti Seithamo o tsweletse a re kereke e fa gare ga dikgwetlho mme jaaka ba-na-le-seabe ba matshego a setshaba a 2016, ba diragatsa letshego la tshaba e e kutlwelo botlhoko e bile e kgathala ka go dira ditiro tsa sennela ruri tse ba tla nnang ba ipelafatsa ka tsone.

O tsweletse a re kereke e dira tiro ya yone ka go dira diphetogo mo bathong ka gore ke yone letswalo la tshaba, a tlatsa ka gore ditshaba di ka nyelela mme kereke e tla tswelela ele teng.

E rile a tswa la gagwe, modulasetilo wa komiti ya banana ba kereke eo, Moruti Duncan Raditsebe a bolela fa a leboga Modimo go bo o ba kgontshitse go dira tiro eo. O boletse fa maikaelelo a bone ele go anamisa botlhokwa jwa go rera lefoko gammogo le go dira ka diatla.

A re tota go aba go simolola mo tikologong e motho a tshelang mo go yone pele ga motho a kaya kgakala. O boletse gore kago ya ntlo e ga se ya ntlha mme ba tsweletse ka go lemoga le go thusa ba ba tlhokileng lesego le go ba abela.

Moruti Raditsebe a re ngwaga le ngwaga ba tshwara bokopano mme gone kwa ba tshwaretseng bokopano teng ba tlogela motlhala wa bakeresete ka mokgwa wa go aba ka moono wa go inosetsa mo semoweng.

E rile a tswa la gagwe Mme Lebogang Sebotso a bolela fa a itumeletse mpho eo fela thata a supa fa Modimo a arabile keletso ya gagwe ya go nna le kwa ene le ba ga gabo ba tla nna teng ka jalo a tla tswelela a tshelela Modimo ka dinako tsotlhe.

Motshwara madi wa lekgotla la banana, Moruti Letlhogonolo Thabalaka a re ba kgonne go aga ntlo eo ka  dithuso  tsa sekolo se segolwane sa ABM le kompone ya MG Properties gammogo le  ba bangwe ba ba  thusitseng  ka didirisiwa tsa kago. BOKHUTLO